شمال مغربی بحرالکاہل کے اس سال کے طاقتور ترین طوفان ’راگاسا‘ نے تائیوان میں تباہی مچانے کے بعد بدھ کو چین کے صوبہ گوانگ ڈونگ اور ہانگ کانگ کو اپنی لپیٹ میں لے لیا۔ شدید بارشوں اور تیز ہواؤں کے باعث تائیوان میں کم از کم 29 افراد ہلاک اور 18 زخمی ہوئے جبکہ 152 افراد تاحال لاپتا ہیں۔
تائیوان کے مشرقی علاقے ہوالین میں بارشوں سے بننے والی دہائیوں پرانی جھیل کی قدرتی بند ٹوٹنے سے پانی اور کیچڑ کا ریلا گاؤں میں داخل ہوگیا جس سے درجنوں مکانات تباہ ہوئے، ایک پل بہہ گیا اور متعدد افراد ملبے تلے دب گئے۔
ہوالین کے مقامی رہائشیوں کا کہنا ہے کہ ’منظر کسی آتش فشاں کے پھٹنے جیسا تھا، پانی اور کیچڑ گھر کی پہلی منزل تک آن پہنچا۔‘
تائیوان کی نیشنل فائر ایجنسی کے مطابق سب سے زیادہ نقصانات ہوالین کاؤنٹی میں ہوئے ہیں جہاں سیکڑوں افراد اپنے گھروں میں پھنس گئے۔ ہنگامی صورتحال کے باعث اب تک 7 ہزار 600 سے زائد افراد کو محفوظ مقامات پر منتقل کیا جا چکا ہے۔
تائیوان کے وزیراعظم چو جنگ تائی نے متاثرہ علاقوں کا دورہ کرتے ہوئے واقعے کی تحقیقات اور بروقت انخلا کے احکامات پر عمل درآمد نہ ہونے پر تشویش کا اظہار کیا۔
فلپائن میں بھی طوفان سے تباہ کاریاں ہوئیں اور 3 افراد ہلاک ہوئے جبکہ ہزاروں لوگ بے گھر ہوگئے۔
چین میں تعلیمی ادارے و کاروباری مراکز بند
دوسری جانب ہانگ کانگ اور مکاؤ میں بھی تیز ہواؤں اور موسلا دھار بارش کے باعث تعلیمی ادارے اور کاروباری مراکز بند کر دیے گئے۔ ہانگ کانگ آبزرویٹری نے بدھ کی صبح طوفانی وارننگ کا سب سے بڑا سگنل نمبر 10 جاری کیا، جب کہ زیادہ سے زیادہ 120 میل فی گھنٹہ کی ہوائیں ریکارڈ کی گئیں۔
حکام کے مطابق شہر میں 800 سے زائد افراد عارضی پناہ گاہوں میں منتقل ہوئے، 56 زخمی ہوئے، 350 درخت اکھڑ گئے، 12 مقامات پر سیلاب اور ایک لینڈ سلائیڈ کی اطلاع ملی۔
چینی صوبہ گوانگ ڈونگ میں بھی طوفان کے داخل ہونے سے ساحلی علاقے خالی کرا لیے گئے جبکہ لوگوں نے اشیائے خورونوش ذخیرہ کر کے گھروں کو محفوظ بنانے کے اقدامات کیے۔
یاد رہے کہ سائنسدانوں کے مطابق موسمیاتی تبدیلیوں کے باعث طوفان پہلے سے کہیں زیادہ طاقتور اور خطرناک ہو رہے ہیں، اور راگاسا کو ماہرین نے 2017 کے ’ہاتو‘ اور 2018 کے ’منگکھٹ‘ جیسے تباہ کن طوفانوں سے بھی زیادہ نقصان دہ قرار دیا ہے۔
دیکھیں: وادی تیراہ واقعہ اسٹرائیک نہیں بلکہ بارود پھٹنے کے باعث پیش آیا؛ ٹی ٹی پی کی تصدیق