کابل: افغانستان کے قائم مقام وزیر داخلہ سراج الدین حقانی نے حالیہ کابل فضائی حملوں کے بعد پاکستان میں مذہبی رہنماؤں، سیاسی جماعتوں اور عوام سے کشیدگی بڑھنے سے روکنے میں کردار ادا کرنے کی اپیل کی ہے، جبکہ ممکنہ ردعمل سے بھی خبردار کیا ہے۔
کابل میں حملے کے متاثرین کی نماز جنازہ کے موقع پر خطاب کرتے ہوئے سراج الدین حقانی نے کہا کہ اسلامی امارت توقع رکھتی ہے کہ پاکستان کے مسلمان اور بااثر حلقے ایسے اقدامات کے خلاف آواز اٹھائیں گے جو معصوم شہریوں کو نشانہ بناتے ہیں اور اسلامی ممالک کے درمیان تعلقات کو نقصان پہنچاتے ہیں۔
انہوں نے کہا کہ افغانستان جنگ میں کمزور نہیں، تاہم کسی اور کے مفاد کے لیے مسلم کمیونٹیز کو نقصان پہنچانا قابل قبول نہیں۔ ان کا کہنا تھا کہ افغان حکومت ایسے اقدامات کے اثرات کا جائزہ لے رہی ہے جبکہ خیرسگالی برقرار رکھنے کی کوشش بھی جاری ہے۔
سراج الدین حقانی نے خبردار کیا کہ کسی بھی جارحانہ اقدام کا جواب دیا جائے گا اور افغانستان اپنے دفاع کا حق محفوظ رکھتا ہے۔
انہوں نے حملے کے بعد اظہارِ تعزیت اور حمایت کرنے والوں کا شکریہ بھی ادا کیا۔
دیکھئیے:افغان سرزمین پاکستان کے خلاف استعمال نہیں ہوگی، طالبان تحریری ضمانت دینے کو تیار ہیں، سہیل شاہین