امریکی عدالت میں جمع کرائے گئے تازہ عدالتی دستاویزات میں انکشاف ہوا ہے کہ بھارتی انٹیلی جنس ایجنسی ’’را‘‘ کے سابق افسر نے ایک بھارتی شہری کو پاکستان، نیپال اور امریکہ میں ٹارگٹ کلنگ کے لیے نہ صرف بھرتی کیا بلکہ اسے ’’اسلحے سے بھرے جہاز‘‘ فراہم کرنے کی یقین دہانی بھی کرائی۔
امریکی عدالت میں نئے الزامات
امریکی وفاقی عدالت میں جمع کرائی گئی دستاویزات کے مطابق گرفتار مبینہ قاتل نکھل گپتا پر منی لانڈرنگ، کریڈٹ کارڈ فراڈ، منشیات و اسلحہ اسمگلنگ اور پاکستان یا نیپال میں قتل کی سازش کے الزامات بھی عائد کیے گئے ہیں۔
امریکی پراسیکیوٹرز نے الزام لگایا کہ یہ قتل کی سازش صرف نیویارک تک محدود نہیں تھی بلکہ نیپال اور پاکستان میں بھی اہداف شامل تھے۔
اسلحہ اور طیارے کی کلیئرنس کی پیشکش
دستاویزات کے مطابق سابق بھارتی افسر وکاش یادو نے واٹس ایپ پیغامات میں نکھل گپتا کو یقین دہانی کرائی کہ وہ ’’خودکار رائفلیں اور پستول‘‘ فراہم کرے گا اور بھارت سے اسلحے کی ترسیل کے لیے طیارے کی کلیئرنس بھی دلوائے گا۔ تاہم یہ شرط رکھی گئی کہ اصل ہدف، ایک امریکی نژاد سکھ رہنما، قتل ہونے کے بعد ہی یہ اسلحہ فراہم کیا جائے گا۔
نیپال اور پاکستان میں اہداف
مئی 2023 میں وکاش یادو نے گپتا کو ہدایت دی کہ اس کا نام ’’امان‘‘ کے طور پر محفوظ کرے۔ اس دوران اس نے نیویارک، کیلیفورنیا اور نیپال یا پاکستان میں اہداف کی تفصیلات بھی فراہم کیں۔ نیپال کے ایک ٹارگٹ کے حوالے سے یادو نے گپتا کو کہا کہ ہٹ مین کو فوری ادائیگی بڑھائی جائے اور اگر ٹارگٹ پکڑا گیا ہے تو فوراً قتل کیا جائے کیونکہ ’’یہ موقع دوبارہ نہیں ملے گا‘‘۔
نکھل گپتا کی گرفتاری اور حوالگی
53 سالہ نکھل گپتا کو جون 2023 میں چیک ریپبلک میں گرفتار کیا گیا اور رواں سال جون میں امریکہ کے حوالے کیا گیا۔ امریکی اٹارنی جنرل میرک گارلینڈ کے مطابق یہ مقدمہ ثابت کرتا ہے کہ امریکہ اپنی سرزمین پر سیاسی کارکنوں کی جان کو خطرے میں ڈالنے کی کوشش ہرگز برداشت نہیں کرے گا۔
ایف بی آئی کے ڈائریکٹر کرسٹوفر رے نے کہا کہ امریکہ میں اظہار رائے کی آزادی پر حملہ کسی بھی غیر ملکی کو برداشت نہیں ہوگا۔
قتل کی سازش اور خفیہ ایجنٹ کی انکشافات
امریکی عدالت کے مطابق نکھل گپتا ایک امریکی سکھ رہنما کے قتل کے لیے ہٹ مین ڈھونڈ رہا تھا، تاہم اس سے رابطہ رکھنے والا شخص دراصل ڈرگ انفورسمنٹ ایجنسی کا خفیہ اہلکار تھا۔ منصوبے کے تحت گپتا نے 1 لاکھ ڈالر ادائیگی پر اتفاق کیا جبکہ ابتدائی 15 ہزار ڈالر نیویارک میں ادا کیے گئے۔
نجر کے قتل سے روابط
18 جون 2023 کو کینیڈا میں سکھ رہنما ہر دیپ سنگھ نجر کو قتل کیا گیا۔ گپتا نے خفیہ اہلکار کو بتایا کہ نجر بھی ایک ہدف تھا اور متعدد افراد کو نشانہ بنانے کا منصوبہ موجود ہے۔
مقدمہ اور سزائیں
گپتا پر قتل کی سازش اور قتل کی کوشش کے الزامات عائد ہیں، جن پر اسے زیادہ سے زیادہ 10 سال قید کی سزا ہو سکتی ہے۔ مقدمہ نیویارک کے جنوبی ضلع میں ایف بی آئی اور ڈی ای اے کی نگرانی میں چل رہا ہے۔
دیکھیں: افغان باشندے اور بھارتی آفیسر پاکستان میں دہشتگردانہ کارروائیوں میں ملوث ہیں؛ ڈی جی آئی ایس پی آر