ایران کے صدر مسعود پزشکیان نے کہا ہے کہ ایران اور پاکستان کے درمیان مزید ہم آہنگی اور تعاون کی ضرورت پہلے سے کہیں زیادہ بڑھ گئی ہے۔
ایک بیان میں انہوں نے کہا کہ ایران اور پاکستان کے مشترکہ مفادات اور تقدیریں پہلے سے کہیں زیادہ جڑی ہوئی ہیں، اور پاکستان کا یومِ آزادی پاکستانی قوم کی کامیابیوں کو خراجِ تحسین پیش کرنے کا ایک قیمتی موقع ہے۔
ایرانی صدر کا کہنا تھا کہ پاکستان کا یومِ آزادی ایران پاکستان کے دیرینہ اور تزویراتی تعلقات کو مزید گہرا اور وسیع کرنے کے لیے ایک نیا موڑ ہے۔ انہوں نے واضح کیا کہ ایران پاکستان کے ساتھ جامع تعلقات کو مزید مضبوط بنانے کے عزم پر قائم ہے۔
مسعود پزشکیان نے کہا کہ باہمی اعتماد و احترام اور موجود وسیع صلاحیتوں سے فائدہ اٹھاتے ہوئے دوطرفہ تعلقات کو مضبوط بنانے کے لیے مزید مؤثر اقدامات کرنے کے لیے تیار ہیں۔
ایرانی صدر نے پاکستان کی ترقی، خوشحالی اور سربلندی کے لیے دعا کی اور امید ظاہر کی کہ ایران اور پاکستان کے دیرینہ و برادرانہ تعلقات مزید مضبوط اور مستحکم ہوں گے۔
خیال رہے کہ یومِ آزادی کے موقع پر امریکی وزیرِ خارجہ مارکو روبیو نے بھی پاکستانی عوام کو دلی مبارکباد پیش کی تھی۔