نائب وزیراعظم و وزیر خارجہ اسحاق ڈار نے اسلام آباد میں شام کے وزیر خارجہ اسعد حسن الشیبانی سے گرمجوشی اور تعمیری ماحول میں ملاقات کی، جس میں پاکستان اور شام کے درمیان دیرینہ برادرانہ تعلقات اور باہمی دلچسپی کے امور پر تبادلہ خیال کیا گیا۔
ملاقات کے دوران دونوں جانب سے پاکستان اور شام کے گہرے برادرانہ تعلقات کو مزید مستحکم بنانے کے عزم کا اعادہ کیا گیا۔ فریقین نے مختلف شعبوں میں دوطرفہ تعاون کو آگے بڑھانے اور باہمی مفاد کے شعبوں میں روابط مزید مستحکم کرنے کے طریقوں پر بھی گفتگو کی۔
اسحاق ڈار اور اسعد حسن الشیبانی نے علاقائی صورتحال پر بھی تفصیلی تبادلہ خیال کیا۔ دونوں رہنماؤں نے خطے میں ہونے والی اہم پیش رفت، امن و استحکام سے متعلق امور اور باہمی دلچسپی کے دیگر معاملات پر اپنے خیالات کا اظہار کیا۔
تقریباً 20 سال بعد اہم دورہ
شامی وزیر خارجہ اسعد حسن الشیبانی کا یہ دو روزہ دورہ 19 اور 20 اگست کو جاری ہے۔ یہ دورہ اس لحاظ سے غیر معمولی اہمیت کا حامل ہے کہ تقریباً دو دہائیوں یعنی 20 برس بعد کسی شامی وزیر خارجہ نے پاکستان کا دورہ کیا ہے۔ وہ ایک اعلیٰ سطحی وفد کے ہمراہ اسلام آباد پہنچے ہیں۔
پاکستانی دفتر خارجہ کے مطابق شامی وزیر خارجہ کے دورے کا بنیادی مقصد دونوں ممالک کے تعلقات کے مختلف پہلوؤں کا جائزہ لینا، باہمی تعاون کے نئے مواقع تلاش کرنا اور علاقائی و بین الاقوامی پیش رفت پر تبادلہ خیال کرنا ہے۔
