نائب وزیراعظم اور وزیرِ خارجہ محمد اسحاق ڈار شنگھائی تعاون تنظیم (ایس سی او) کے سربراہانِ حکومت کے اجلاس میں شرکت کیلئے ماسکو روانہ ہو گئے، جہاں وہ پاکستانی وفد کی قیادت کریں گے۔ یہ اجلاس 17 اور 18 نومبر کو روسی وزیراعظم کی دعوت پر ہو رہا ہے۔
ترجمان دفترِ خارجہ کے مطابق اسحاق ڈار اجلاس سے خطاب میں اہم علاقائی اور عالمی امور پر پاکستان کے مؤقف کے ساتھ ساتھ ایس سی او کو مزید موثر اور مضبوط بنانے سے متعلق تجاویز بھی پیش کریں گے۔
نائب وزیراعظم اس موقع پر ایس سی او کے رکن ممالک کے سربراہان اور رہنماؤں سے دو طرفہ ملاقاتیں بھی کریں گے تاکہ اقتصادی تعاون، علاقائی رابطوں اور باہمی شراکت داری کے نئے مواقع پر بات چیت کی جا سکے۔ اجلاس میں چین، روس، قازقستان، کرغزستان، تاجکستان، ازبکستان اور بیلاروس کے سربراہانِ حکومت کے علاوہ ایران کے نائب صدر، جبکہ پاکستان اور بھارت کی نمائندگی وزرائے خارجہ کی سطح پر ہوگی۔
اس دورے کو پاکستان اور ایس سی او ممالک کے درمیان تعاون کے فروغ اور علاقائی تعاون کے نئے راستے کھولنے کے ایک اہم موقع کے طور پر دیکھا جا رہا ہے۔
دیکھیں: ایران کے بعد روس نے بھی پاکستان اور افغانستان کیلئے ثالثی کا کردار ادا کرنے کی پیشکش کر دی