اسلام آباد: نائب وزیراعظم و وزیر خارجہ اسحاق ڈار اور چین کے وزیر خارجہ وانگ ای کے درمیان ٹیلیفونک رابطہ ہوا، جس میں اسلام آباد میں ہونے والے ایران-امریکہ مذاکرات اور خطے کی صورتحال پر تفصیلی تبادلہ خیال کیا گیا۔ یہ رابطہ حالیہ سفارتی پیش رفت کے تناظر میں پیر کے روز ہوا۔
ترجمان دفتر خارجہ کے مطابق دونوں رہنماؤں نے ایران اور امریکہ کے درمیان براہِ راست بات چیت اور اس میں پاکستان کے کردار پر گفتگو کی، جبکہ خطے میں امن و استحکام کیلئے جاری سفارتی کوششوں کا جائزہ لیا گیا۔
چینی وزیر خارجہ وانگ ای نے پاکستان کی جانب سے امن کے فروغ کیلئے کی جانے والی کاوشوں کو سراہتے ہوئے مبارکباد دی اور پاکستان کے تعمیری سفارتی کردار کی مکمل حمایت جاری رکھنے کے عزم کا اعادہ کیا۔
اسحاق ڈار نے اس موقع پر خطے میں پائیدار امن کیلئے مکالمے اور سفارتکاری کے تسلسل کے عزم کو دہرایا اور کہا کہ پاکستان مذاکرات کے ذریعے تنازعات کے حل کا حامی ہے۔
تجزیہ کاروں کے مطابق چین کی جانب سے پاکستان کے کردار کی کھل کر حمایت اس بات کی عکاسی کرتی ہے کہ اسلام آباد عالمی سفارتی سطح پر ایک مؤثر اور قابل اعتماد ثالث کے طور پر ابھر رہا ہے، جبکہ خطے میں استحکام کیلئے پاکستان کی کوششوں کو بین الاقوامی تائید حاصل ہو رہی ہے۔
