چیف آف ڈیفنس فورسز فیلڈ مارشل عاصم منیر نے قومی علما مشائخ کانفرنس سے خطاب کرتے ہوئے واضح کیا کہ ریاست کے علاوہ کسی فرد یا گروہ کو جہاد کا حکم یا فتویٰ دینے کا اختیار نہیں۔ انہوں نے کہا کہ اسلام میں جہاد جیسے حساس معاملے کا فیصلہ صرف ریاستی دائرہ اختیار میں آتا ہے۔
تفصیلات کے مطابق علما مشائخ کانفرنس میں اظہارِ خیال کرتے ہوئے فیلڈ مارشل عاصم منیر نے کہا کہ اللہ تعالیٰ نے اسلامی ممالک میں سے محافظِ حرمین کا شرف پاکستان کو عطا کیا ہے۔ انہوں نے کہا کہ ریاستِ طیبہ اور ریاستِ پاکستان کے درمیان گہرا تعلق اور مماثلت پائی جاتی ہے۔
ان کے مطابق دونوں ریاستوں کا قیام کلمۂ طیبہ کی بنیاد پر ماہِ رمضان میں ہوا اور یہ مماثلت اس بات کی دلیل ہے کہ ایک ریاست کو خادمِ حرمین اور دوسری کو محافظِ حرمین کا منصب عطا کیا گیا۔
فیلڈ مارشل نے آپریشن بنیان المرصوص کا حوالہ دیتے ہوئے کہا کہ اس کارروائی کے دوران اللہ تعالیٰ کی مدد کو عملی طور پر محسوس کیا گیا، جو حق اور صداقت کی واضح تائید ہے۔
افغانستان سے متعلق گفتگو میں انہوں نے کہا کہ افغان طالبان کی پشت پناہی سے دہشت گردی کے ذریعے شہریوں اور معصوم بچوں کو نشانہ بنایا جا رہا ہے۔ فیلڈ مارشل کے مطابق فتنہ الخوارج کی وہ تنظیمیں جو افغانستان سے پاکستان میں کارروائیاں کر رہی ہیں، ان میں تقریباً 70 فیصد عناصر افغانی ہیں۔ انہوں نے واضح کیا کہ افغانستان کو فتنہ الخوارج اور پاکستان میں سے کسی ایک کا انتخاب کرنا ہوگا۔
خطاب کے اختتام پر انہوں نے کہا کہ جن قوموں نے اپنے اسلاف کی علمی اور فکری میراث کو ترک کر دیا، وہ زوال کا شکار ہو گئیں۔ انہوں نے علما اور مشائخ کو اس جانب متوجہ کیا کہ وہ معاشرے میں فکری رہنمائی کا کردار ادا کریں اور ریاست کے ساتھ مل کر انتہا پسندی اور دہشت گردی کے بیانیے کا مؤثر توڑ کریں۔