Skip to content 
اسلامی امارتِ افغانستان اور اسلامی جمہوریہ پاکستان کے درمیان ترکیہ میں ہونے والے مذاکرات کامیابی کے ساتھ اختتام پذیر ہو گئے۔ یہ مذاکرات برادر ممالک ترکیہ اور قطر کی درخواست اور ثالثی پر استنبول میں منعقد ہوئے، جن کا مقصد دونوں ممالک کے درمیان حالیہ جنگ بندی کو مضبوط بنانا تھا۔
اسلامی امارتِ افغانستان کے ترجمان نے ایک بیان میں کہا کہ امارت ہمیشہ سے مسائل کے حل کے لیے سفارتکاری اور مفاہمت پر یقین رکھتی ہے، اسی مقصد کے تحت ایک جامع اور پیشہ ور ٹیم کے ذریعے مذاکرات کا آغاز کیا گیا، جو مکمل سنجیدگی اور تعاون کے ساتھ کئی روز تک جاری رہے۔
ترجمان کے مطابق، اسلامی امارت تمام ہمسایہ ممالک کے ساتھ اچھے تعلقات چاہتی ہے اور پاکستان کے ساتھ بھی باہمی احترام، عدم مداخلت اور خطرہ نہ بننے کی پالیسی پر قائم رہتے ہوئے مثبت تعلقات کی خواہاں ہے۔ مذاکرات ایک پیچیدہ عمل تھے جو اس نتیجے پر پہنچے کہ دونوں فریق آئندہ ملاقات میں باقی ماندہ امور پر مزید بات چیت کریں گے۔
ترکیہ کی وزارتِ خارجہ نے مذاکرات کے اختتام پر جاری بیان میں کہا کہ پانچ روزہ مذاکرات 25 سے 30 اکتوبر 2025 تک استنبول میں منعقد ہوئے، جن کا مقصد 18 اور 19 اکتوبر کو دوحہ میں طے پانے والی جنگ بندی کو مضبوط بنانا تھا۔
بیان میں مزید کہا گیا کہ تمام فریقین نے جنگ بندی کے تسلسل پر اتفاق کیا ہے، جبکہ اس پر عمل درآمد کی تفصیلات اور طریقہ کار کا فیصلہ 6 نومبر 2025 کو استنبول میں پرنسپل سطح کے اجلاس میں کیا جائے گا۔
اس کے علاوہ، فریقین نے امن کی نگرانی اور تصدیق کے لیے ایک مشترکہ میکانزم قائم کرنے پر بھی رضامندی ظاہر کی ہے، جو خلاف ورزی کی صورت میں ذمہ دار فریق پر جرمانہ عائد کرے گا۔
ترکیہ اور قطر نے دونوں ممالک کی فعال شرکت کو سراہتے ہوئے اس عزم کا اظہار کیا کہ وہ دیرپا امن و استحکام کے لیے افغانستان اور پاکستان کے ساتھ تعاون جاری رکھیں گے۔
دیکھیں: پاکستان اور افغانستان کے درمیان مذاکرات بے نتیجہ ختم
