کراچی میں قانون نافذ کرنے والے اداروں نے تخریب کاری کا ایک بڑا منصوبہ ناکام بناتے ہوئے ‘فتنہ الہندوستان’ سے وابستہ تین انتہائی مطلوب دہشت گردوں کو گرفتار کر لیا ہے۔ سندھ رینجرز اور سی ٹی ڈی نے کراچی کے علاقے چکرا گوٹھ، کورنگی میں خفیہ اطلاع پر مشترکہ کاروائی کی، جس کے نتیجے میں دہشت گردوں کے ایک خطرناک نیٹ ورک کا سراغ لگایا گیا۔
ترجمان رینجرز کے مطابق گرفتار ملزمان کی شناخت یاسر عرفات، خدا بخش اور زاہد حسین عرف بارکزئی کے نام سے ہوئی ہے۔ ملزمان کے قبضے سے پانچ کلو گرام بارودی مواد، 10 میٹر پرائما کارڈ، تین ڈیٹونیٹرز اور ایک کلو گرام بال بیرنگ برآمد ہوئے ہیں۔ اس کے علاوہ سیکیورٹی حکام نے ملزمان کے ٹھکانے سے انتہا پسندی پر مبنی لٹریچر کے تقریباً 250 بکس اور ایک لیپ ٹاپ بھی اپنی تحویل میں لے لیا ہے۔
ابتدائی تفتیش کے دوران یہ سنسنی خیز انکشاف ہوا ہے کہ گرفتار ملزمان تعلیمی اداروں میں زیرِ تعلیم طلبا کو کالعدم تنظیم کی جانب راغب کرنے اور ان کی ‘ذہن سازی’ (برین واشنگ) کے عمل میں ملوث تھے۔ ملزمان نے کراچی کے مختلف حساس مقامات کو نشانہ بنانے کے لیے بارودی مواد خفیہ مقامات پر چھپا رکھا تھا، جسے بروقت کارروائی کے ذریعے قبضے میں لے لیا گیا۔ سیکیورٹی ذرائع کا کہنا ہے کہ گرفتار افراد کو مزید قانونی چارہ جوئی کے لیے پولیس کے حوالے کر دیا گیا ہے، جبکہ تفتیش کا دائرہ وسیع کر کے ان کے دیگر سہولت کاروں کی تلاش شروع کر دی گئی ہے۔
دیکھیے: تحصیل ماموند میں مقامی تھانے پر حملہ، ایڈیشنل ایس ایچ او شہید