خیبر پختونخوا کے ضلع کرک میں نامعلوم مسلح افراد کی فائرنگ سے اسٹیشن ہاؤس آفیسر (ایس ایچ او) داؤد خان سمیت 2 پولیس اہلکار شہید ہوگئے۔ گورنر خیبر پختونخوا فیصل کریم کنڈی نے واقعے کی مذمت کرتے ہوئے صوبائی حکومت کو تنقید کا نشانہ بنایا ہے۔
اطلاعات کے مطابق کرک کے علاقے نیو کرپہ میں نامعلوم مسلح افراد نے پولیس پارٹی پر فائرنگ کی، جس کے نتیجے میں ایس ایچ او داؤد خان اور پولیس اہلکار فرہاد شہید ہوگئے۔
واقعے کے بعد پولیس نے علاقے کو گھیرے میں لے کر حملہ آوروں کی تلاش شروع کردی۔
گورنر خیبر پختونخوا فیصل کریم کنڈی نے سماجی رابطے کی ویب سائٹ ایکس پر اپنے بیان میں فائرنگ کے واقعے کی شدید مذمت کی اور شہید اہلکاروں کے اہلخانہ اور ساتھیوں سے تعزیت کا اظہار کیا۔
فیصل کریم کنڈی نے الزام عائد کیا کہ پاکستان تحریک انصاف (پی ٹی آئی) نے خیبر پختونخوا کو دہشت گردوں کے رحم و کرم پر چھوڑ دیا ہے۔ ان کے مطابق صوبائی حکومت کی جانب سے دہشت گردی کے ذمہ دار عناصر کی حمایت اور ان سے سمجھوتوں کی قیمت پولیس، مسلح افواج اور شہری اپنی جانوں کی قربانی دے کر ادا کر رہے ہیں۔
گورنر خیبر پختونخوا نے سوال اٹھایا کہ صوبائی حکومت کو اپنی ذمہ داری کا احساس دلانے کے لیے مزید کتنی جانوں کا ضیاع درکار ہے۔