اسلام آباد: وزیر دفاع خواجہ آصف نے ایران۔امریکا جنگ بندی پر ردعمل دیتے ہوئے کہا ہے کہ پاکستان دنیا کی ایک بڑی جنگ رکوانے میں کامیاب ہوا اور عالمی سطح پر ایک بااعتماد ثالث کے طور پر ابھر کر سامنے آیا ہے۔
پارلیمنٹ ہاؤس کے باہر میڈیا سے گفتگو کرتے ہوئے خواجہ آصف نے کہا کہ “سب کو مبارک ہو، اللہ نے پاکستان کو دنیا بھر میں عزت دی، آج عالمی طاقتیں اور عرب ممالک سمیت پوری دنیا کی نظریں پاکستان پر مرکوز ہیں۔”
انہوں نے کہا کہ کل تک جنگ کے گہرے بادل چھائے ہوئے تھے لیکن فیلڈ مارشل عاصم منیر اور وزیراعظم شہباز شریف کی کوششوں سے جنگ بندی ممکن ہوئی، جس کے بعد پاکستان ایک نئے سیاسی اور سفارتی دور میں داخل ہو رہا ہے۔
وزیر دفاع کا کہنا تھا کہ اس پیش رفت سے ملک میں استحکام آئے گا اور اب توجہ معیشت کی بحالی پر مرکوز کی جا سکے گی۔
انہوں نے سول و عسکری قیادت کے اشتراک کو سراہتے ہوئے کہا کہ “ہائبرڈ ماڈل” نے گزشتہ چند برسوں میں اہم کامیابیاں حاصل کیں اور یہ ثابت کیا کہ قومی قیادت یکجا ہو تو پاکستان عالمی سطح پر مؤثر کردار ادا کر سکتا ہے۔
خواجہ آصف نے بھارت پر تنقید کرتے ہوئے کہا کہ “مودی فارغ ہو گیا، اس کے پاس کچھ نہیں رہا، بھارتی میڈیا اب تڑپتا رہے گا”، اور دعویٰ کیا کہ پاکستان نے بڑے دشمن کو سفارتی محاذ پر شکست دی ہے۔
انہوں نے کہا کہ اب پاکستان کو داخلی محاذ، معیشت اور دہشت گردی کے چیلنجز پر توجہ دینا ہوگی، جبکہ افغانستان کو بھی پاکستان کی میزبانی کا لحاظ کرنا چاہیے۔
تجزیہ کاروں کے مطابق پاکستان کی حالیہ سفارتی کامیابی نے خطے میں اس کے کردار کو مزید مضبوط کیا ہے، تاہم داخلی استحکام اور معاشی بہتری اب اگلا بڑا چیلنج ہوگا۔
