سری لنکا پولیس نے لنکا پریمیئر لیگ (ایل پی ایل) کے آغاز سے چند گھنٹے قبل ایک بڑی کارروائی کی۔ پولیس نے لیگ کی فرنچائز جعفنا کنگز کے بھارتی شریک مالک کو میچ فکسنگ کے شبہے میں گرفتار کر لیا۔
اسپورٹس انویسٹی گیشن یونٹ کے انسپکٹر سپُن ویداناگے کے مطابق گرفتار ملزم کی شناخت منجوت کلرا کے نام سے ہوئی۔ منجوت کلرا 2018 کے انڈر19 ورلڈ کپ فائنل میں یادگار سنچری بنانے والے سابق بھارتی کرکٹر ہیں، جنہوں نے بعد میں اسپورٹس مینجمنٹ کا شعبہ اختیار کیا۔
پولیس کے مطابق انہیں کولمبو کے ایک ہوٹل سے اس وقت گرفتار کیا گیا جب وہ مبینہ طور پر ایک کھلاڑی کو 95 لاکھ سری لنکن روپے (تقریباً 28 ہزار 700 امریکی ڈالر) رشوت دینے والے تھے۔
پولیس کے مطابق متعلقہ کھلاڑی نے تقریباً 10 روز قبل پہلی مرتبہ رشوت کی پیشکش کیے جانے پر حکام کو آگاہ کر دیا تھا۔ تفتیشی حکام نے کھلاڑی کی شناخت ظاہر نہیں کی، تاہم رپورٹس کے مطابق شکایت جعفنا کنگز کے ہی کھلاڑیوں بھانوکا راجاپکسا، اویشکا فرنینڈو اور دنیتھ ویلالاگے کی جانب سے درج کرائی گئی۔
سری لنکا کرکٹ بورڈ (ایس ایل سی) نے واضح کیا کہ اس گرفتاری کے باوجود ایل پی ایل کا چھٹا ایڈیشن مقررہ شیڈول کے مطابق ہی شروع ہو گا۔ ٹورنامنٹ کا آغاز کولمبو میں جعفنا اور گالے کی ٹیموں کے درمیان میچ سے ہوا۔
واضح رہے کہ لنکا پریمیئر لیگ اس سے قبل بھی کرپشن اور میچ فکسنگ کے الزامات کی زد میں آ چکی ہے۔ رواں سال جنوری میں سری لنکا کی ایک عدالت نے دمبولا تھنڈرز ٹیم کے برطانوی مالک تمیم رحمان کو میچ فکسنگ کے مقدمے میں 4 سال قید کی سزا سنائی تھی، تاہم یہ سزا 5 سال کے لیے معطل کر دی گئی تھی۔