مردان کے علاقے طورُو میں نامعلوم افراد کی فائرنگ سے جمعیت علمائے اسلام (جے یو آئی) کے مقامی رہنما مولانا عابد علی شہید ہو گئے۔ واقعہ اس وقت پیش آیا جب وہ نمازِ فجر کی ادائیگی کے لیے مسجد جا رہے تھے۔
مقامی ذرائع کے مطابق موٹر سائیکل سوار حملہ آوروں نے قریب آ کر اندھا دھند فائرنگ کی، جس کے نتیجے میں مولانا عابد علی موقع پر ہی جاں بحق ہو گئے۔ حملہ آور واردات کے بعد فرار ہونے میں کامیاب ہو گئے۔
مولانا عابد علی بنڑ طورُو مردان میں امام و خطیب کے فرائض بھی سرانجام دے رہے تھے اور علاقے میں ایک بااثر مذہبی و سماجی شخصیت سمجھے جاتے تھے۔ واقعے کی اطلاع ملتے ہی پولیس موقع پر پہنچ گئی اور شواہد اکٹھے کر کے تحقیقات کا آغاز کر دیا گیا ہے، جبکہ علاقے کو گھیرے میں لے کر سرچ آپریشن بھی کیا جا رہا ہے۔