عالم اسلام کی 500 بااثر شخصیات کی فہرست جاری، مفتی تقی عثمانی کا دوسرا نمبر

اردن کے رائل انسٹی ٹیوٹ آف اسٹریٹجک اسٹڈیز نے 2026 کے لیے دنیا کے 500 سب سے بااثر مسلمانوں کی فہرست جاری کر دی ہے۔ فہرست کے مطابق پاکستان کے جیّد عالم دین مفتی تقی عثمانی کو مسلم دنیا میں دوسری بااثر شخصیت قرار دیا گیا ہے۔

فہرست کے مطابق قطر کے امیر شیخ تمیم بن حمد آل ثانی رواں سال کی سب سے بااثر مسلم شخصیت قرار پائے ہیں جبکہ مفتی محمد تقی عثمانی کا نام دوسرے نمبر پر رہے۔

پچاس بااثر مسلم شخصیات میں مفتی تقی عثمانی کے علاوہ پاکستان کے نامور علما و اسکالر حضرات کے نام سامنے آئے ہین جن میں مولانا طارق جمیل، تبلیغی جماعت کے امیر مولانا نذرالرحمان اور دعوتِ اسلامی کے بانی مولانا الیاس قادری بھی سرفہرست شامل ہیں۔

فہرست میں پاکستان کے علاوہ ایران کے آیت اللہ سید علی خامنہ ای، ترکی کے صدر رجب طیب اردوان، سعودی عرب کے فرماں روا شاہ سلمان بن عبدالعزیز، ولی عہد شہزادہ محمد بن سلمان اور برکینا فاسو کے صدر کیپٹن ابراہیم تراورے شامل ہیں۔

اس کے علاوہ ملائیشیا کے وزیر اعظم انور ابراہیم، آذربائیجان کے صدر الہام علیوف، ترکی کے انٹیلی جنس سربراہ ابراہیم قالن، حماس کے رہنما خالد مشعل اور شام کے صدر احمد الشرع کے نام بھی فہرست میں مذکور ہیں۔

فہرست میں شامل دیگر پاکستانی شخصیات میں وزیر اعظم شہباز شریف، فیلڈ مارشل سید عاصم منیر، جیو گروپ کے چیئرمین میر شکیل الرحمان، حامد میر، جماعت اسلامی کے حافظ نعیم الرحمان، سابق وزیر اعظم عمران خان، سائنسدان ڈاکٹر عمر سیف اور نوبل انعام یافتہ ملالہ یوسفزئی کے نام بھی شامل ہیں۔

شاہی ادارے کی جانب سے اس نوعیت کی فہرست ہر سال علمی، سیاسی، مذہبی اور سماجی شعبوں میں اثر و رسوخ رکھنے والی مسلم شخصیات کے نمایاں کردار اور خدمات کی بنیاد پر مرتب کی جاتی ہے۔

دیکھیں: قومی پرچم کی توہین پر 25 سال قید اور بھاری جرمانہ عائد کیا جائے گا؛ وزارتِ داخلہ یو اے ای