افغان میڈیا کی رپورٹس میں دعویٰ کیا گیا ہے کہ پاکستان تحریک انصاف کے اشتہاری رہنما مراد سعید افغانستان کے صوبہ پکتیکا کے مرکز شاران میں افغان طالبان کے رہنما مولوی عبدالخالق آخوند کی پناہ میں موجود ہیں۔ اس خبر کے سامنے آنے کے بعد ملکی سیاسی منظرنامے میں ایک نیا طوفان کھڑا ہو گیا ہے۔
صحافی حسن خان اور جاوید چوہدری نے دعویٰ کیا ہے کہ پاکستان تحریک انصاف (پی ٹی آئی) کے رہنما اور سابق وفاقی وزیر مراد سعید افغانستان کے صوبہ پکتیکا کے شہر شرنہ میں موجود ہیں، جہاں انہیں افغان طالبان کے مقامی رہنما عبدالخالق اخوند نے پناہ دے رکھی ہے۔
سیاسی تجزیہ کاروں اور حکومتی حلقوں کی جانب سے اس صورتِ حال کو پی ٹی آئی، کالعدم ٹی ٹی پی اور افغان طالبان کے درمیان فکری اور عملی اشتراک قرار دیا جا رہا ہے۔ ماہرین کا کہنا ہے کہ ایک طرف کے پی میں عسکریت پسندوں کی موجودگی اور دوسری طرف مرکزی رہنما کا دشمن کی سرزمین پر پناہ لینا کسی بڑے گٹھ جوڑ کا ثبوت ہے۔
مختلف بیانات میں اس بات پر زور دیا گیا ہے کہ ریاست مخالف بیانیہ اپنانے والے اور اداروں پر تنقید کرنے والے عناصر اب کھل کر بیرونی پناہ گاہوں کا سہارا لے رہے ہیں۔ وفاقی حلقوں کا مؤقف ہے کہ ملک کو اندرونی اور بیرونی سازشوں سے بچانے کے لیے سخت اور بروقت فیصلے ناگزیر ہو چکے ہیں۔
دوسری جانب، انکشافات کے بعد سوشل میڈیا پر بھی بحث چھڑ گئی ہے جہاں مختلف آراء کے ذریعے یہ سوال اٹھایا جا رہا ہے کہ کیا تحریک انصاف واقعی پاکستان کے اندر دہشت گرد عناصر کی پشت پناہی کر رہی ہے؟
