شمالی وزیرستان کے ٹنڈی گاؤں میں سکیورٹی فورسز نے کامیاب کارروائی کرتے ہوئے کالعدم تحریکِ طالبان پاکستان سے تعلق رکھنے والے ایک خطرناک دہشتگرد کو ہلاک کر دیا ہے۔
ذرائع کے مطابق یہ واقعہ گزشتہ شب پیش آیا جب سکیورٹی فورسز کی جانب سے ٹنڈی گاؤں میں آپریشن کیا جا رہا تھا۔ کارروائی کے دوران 81 ایم ایم مارٹر گولے کی زد میں آ کر مذکورہ خارجی دہشتگرد موقع پر ہی مارا گیا۔
ہلاک ہونے والے دہشتگرد کی شناخت خارجی ابو بکر عرف سبین ولد گل جان کے نام سے ہوئی ہے، جو پیپل، کبیل خیل کا رہائشی بتایا جاتا ہے۔ ابتدائی رپورٹس کے مطابق ہلاک دہشتگرد سکیورٹی فورسز پر حملوں اور دیگر متعدد دہشتگردانہ کارروائیوں میں براہِ راست ملوث تھا۔
ملک بھر بالخصوص خیبر پختونخوا اور بلوچستان سے دہشتگردی کے مکمل خاتمے کے لیے سکیورٹی فورسز کے آپریشنز بلا تعطل جاری ہیں۔ شمالی وزیرستان کے علاوہ دیر، خاران اور دیگر حساس اضلاع میں بھی انٹیلی جنس بیسڈ سرچ اینڈ کلیئرنس آپریشنز تیزی سے کیے جا رہے ہیں۔
حکام کا کہنا ہے کہ سکیورٹی فورسز اور قانون نافذ کرنے والے ادارے ملک میں امن و امان کے قیام اور شہریوں کے تحفظ کے لیے پوری طرح متحرک ہیں، اور دہشتگردوں کے مکمل خاتمے تک یہ آپریشنز جاری رہیں گے۔