حال ہی میں اقوامِ متحدہ کے ہائی کمشنر برائے انسانی حقوق نے تشدد سے متعلق اقوامِ متحدہ کی خصوصی نمائندہ ایلس جل ایڈورڈز کا ایک نیوز ریلیز جاری کیا جس میں سابق وزیراعظم عمران خان کی مبینہ قیدِ تنہائی اور حالات پر تشویش کا اظہار کیا گیا۔ اس ریلیز میں پاکستان پر زور دیا گیا کہ وہ مبینہ طور پر “غیر انسانی” اقدامات کا خاتمہ کرے اور عمران خان کو مناسب طبی سہولیات فراہم کرے۔ تاہم اس بیان کے قانونی، ادارہ جاتی اور طریقۂ کار سے متعلق پہلوؤں کو سمجھے بغیر اسے کسی حتمی بین الاقوامی فیصلے کے طور پر پیش کرنا ایک بنیادی غلط فہمی کو جنم دے رہا ہے۔
سب سے اہم نکتہ یہ ہے کہ یہ بیان اقوامِ متحدہ کا نہیں، نہ ہی انسانی حقوق کونسل کی جانب سے کوئی باضابطہ فائنڈنگ ہے۔ اسپیشل ریپورٹرز اقوامِ متحدہ کے انسانی حقوق کونسل کے تحت کام کرنے والے آزاد ماہرین ہوتے ہیں جو واضح طور پر ذاتی حیثیت میں رائے دیتے ہیں۔ ان کے بیانات نہ قانونی طور پر پابند ہوتے ہیں، نہ کسی ریاست پر کوئی ذمہ داری عائد کرتے ہیں اور نہ ہی کسی قسم کی پابندی، عدالتی کارروائی یا بین الاقوامی عمل کو متحرک کرتے ہیں۔
اہم بات یہ بھی ہے کہ اس ادارے کا کردار اس معاملے میں محض انتظامی رابطے تک محدود ہے۔ ادارہ اس مواد کی نہ تو تصدیق کرتا ہے، نہ اس کی توثیق اور نہ ہی اس کی ذمہ داری قبول کرتا ہے۔ پریس ریلیز میں استعمال کیے گئے الفاظ “موصول ہونے والی معلومات کے مطابق” اس امر کی نشاندہی کرتے ہیں کہ یہ الزامات غیر مصدقہ ذرائع، وکلا کے بیانات یا تیسرے فریق کے دعوؤں پر مبنی ہیں۔ اس ضمن میں نہ کسی میڈیکل بورڈ کی رپورٹ پیش کی گئی، نہ کسی آزاد جیل معائنے کا حوالہ دیا گیا، اور نہ ہی کسی عدالتی یا معاہداتی ادارے نے تشدد یا غیر انسانی سلوک کا تعین کیا ہے۔
اس کے باوجود ایسے بیانات اکثر سیاسی اور سفارتی سطح پر ایک مضبوط بیانیہ تشکیل دیتے ہیں۔ بالخصوص جب انہیں منظم مہمات، امریکی کانگریس کے چند اراکین یا برطانوی پارلیمان کے منتخب حلقوں کی سیاسی تقاریر کے ساتھ جوڑ دیا جائے تو یہ تاثر پیدا ہوتا ہے کہ کوئی بین الاقوامی فیصلہ صادر ہو چکا ہے۔ حقیقت میں ایسا نہیں ہوتا۔ اسپیشل پروسیجرز کے بیانات کا اثر زیادہ تر شہرت تک محدود رہتا ہے، قانونی یا عملی نتائج سے اس کا کوئی لینا دینا نہیں ہوتا۔
اعداد و شمار اس حقیقت کو مزید واضح کرتے ہیں۔ صرف 2021 سے 2024 کے دوران اسپیشل ریپورٹرز نے 629 رسمی رپورٹس انسانی حقوق کونسل اور جنرل اسمبلی میں پیش کیں، جب کہ ہر سال سیکڑوں پریس اسٹیٹمنٹس جاری ہوتی ہیں۔ ان میں سے اکثریت چند دنوں کی میڈیا توجہ کے بعد کسی عملی نتیجے کے بغیر ختم ہو جاتی ہے۔ پاکستان کے حوالے سے بھی گزشتہ برسوں میں مختلف موضوعات پر کم از کم 14 اسپیشل پروسیجرز بیانات جاری ہوئے۔
ایلس جل ایڈورڈز کی جانب سے پاکستان پر جاری ہونے والا حالیہ بیان خود اس امر کو تسلیم کرتا ہے کہ معاملہ “فالو اپ” کے مرحلے میں ہے، یعنی نہ کوئی حتمی نتیجہ نکالا گیا ہے اور نہ ہی کسی خلاف ورزی کو ثابت کیا گیا ہے۔ مزید یہ کہ پاکستان کی جانب سے اسپیشل پروسیجرز کے ساتھ رابطہ اور مشاورت کا ریکارڈ موجود ہے، جو کسی قسم کی ادارہ جاتی عدم تعاون کے دعوے کو بھی کمزور کرتا ہے۔
یہاں سوال انسانی حقوق کے انکار کا نہیں، بلکہ احتساب، تصدیق اور طریقۂ کار کا ہے۔ جب تشدد جیسے سنگین قانونی تصورات کو بغیر عدالتی یا تحقیقی بنیاد کے استعمال کیا جائے تو یہ نہ صرف قانونی معنویت کو کمزور کرتا ہے بلکہ انسانی حقوق کے عالمی نظام کی ساکھ کو بھی متاثر کرتا ہے۔
بالآخر، اسپیشل ریپورٹرز کا کردار انسانی حقوق کے عالمی مباحثے میں توجہ مرکوز کرانا اور اخلاقی سوالات اٹھانا ضرور ہے، مگر انہیں عدالتی فیصلے یا بین الاقوامی قانونی تعین کے متبادل کے طور پر پیش کرنا ایک فکری مغالطہ ہے۔ جب غیر مصدقہ معلومات پر مبنی ذاتی آراء کو اقوامِ متحدہ کے “موقف” کے طور پر گردش میں لایا جاتا ہے تو نہ صرف ریاستی عمل کی غلط تصویر بنتی ہے بلکہ خود انسانی حقوق کے نظام کی پیشہ ورانہ ساکھ بھی متاثر ہوتی ہے۔
دیکھیں: اقوام متحدہ کی بریفنگ: افغانستان کی بگڑتی سکیورٹی اور علاقائی خطرات