کوئٹہ: بلوچستان میں منگی ڈیم پولیس اسٹیشن پر دہشت گردانہ حملے کے تسلسل میں پاک فوج، ایف سی اور بلوچستان پولیس کا مشترکہ آپریشن شعبان کامیابی سے جاری ہے۔ سکیورٹی ذرائع کے مطابق 5 جولائی سے شروع ہونے والے اس آپریشن اور دیگر انٹیلی جنس بیسڈ کارروائیوں میں اب تک مجموعی طور پر 75 دہشت گرد ہلاک کیے جا چکے ہیں۔
سکیورٹی ذرائع کا کہنا ہے کہ دشوار گزار پہاڑی علاقوں میں فتنہ الخوارج کے خلاف گھیرا مزید تنگ کر دیا گیا ہے۔ گزشتہ 24 گھنٹوں کے دوران زمینی اور فضائی کاروائیوں کے ذریعے مزید 13 خارجی دہشت گردوں کو ہلاک کیا گیا، جس کے بعد صرف آپریشن شعبان کے دوران ہلاک ہونے والے خوارج کی مجموعی تعداد 39 ہو گئی ہے، جبکہ 6 اور 7 جولائی کو بھی 26 خوارج مارے گئے تھے۔
اس آپریشن کے علاوہ، آج صبح خضدار کے علاقے زیدی میں دہشت گردوں کی جانب سے پولیس اسٹیشن پر کیا گیا حملہ بھی ناکام بنا دیا گیا ہے۔ پاک فوج اور ایف سی کے دستوں نے کارروائی کرتے ہوئے 8 دہشت گردوں کو موقع پر ہی ہلاک کر کے اس بزدلانہ حملے کو پسپا کیا۔
اہم بات یہ کہ اسی کارروائی کے تسلسل میں ہیلی کاپٹر آپریشنز بھی کیے گئے، جس میں مزید 5 سے 6 دہشت گردوں کے مارے جانے کی مصدقہ اطلاعات ہیں۔ سیکیورٹی فورسز نے عزم ظاہر کیا ہے کہ صوبے سے فتنہ الخوارج اور مفرور عناصر کے مکمل خاتمے تک یہ آپریشنز بلاامتیاز جاری رہیں گے۔
