وفاقی حکومت نے ایرانی حکام کے ساتھ کامیاب مذاکرات کے بعد بلوچستان میں پاکستان اور ایران کی سرحد پر واقع جلاگی بارڈر کراسنگ کو دوبارہ فعال کرنے کا فیصلہ کر لیا ہے۔ اس فیصلے سے دونوں ممالک کے مابین سرحدی تجارتی سرگرمیوں اور آمدورفت میں اہم پیش رفت متوقع ہے۔
ڈپٹی کمشنر کیچ یاسر اقبال دشتی کے مطابق جلاگی بارڈر کراسنگ کو مکمل طور پر کھولنے کے لیے آئندہ چند روز کے اندر تمام ضروری تکنیکی انتظامات مکمل کر لیے جائیں گے۔
انہوں نے بتایا کہ سرحدی انتظام اور تکنیکی مراحل کو حتمی شکل دیے جانے تک تجارتی تسلسل کو برقرار رکھنے کے لیے متبادل انتظامات کیے گئے ہیں۔
ڈپٹی کمشنر نے مزید واضح کیا کہ جب تک جلاگی بارڈر مکمل طور پر فعال نہیں ہو جاتا، تب تک مقامی تاجروں اور عوام کو عارضی طور پر جرک بارڈر کراسنگ کے ذریعے آمدورفت اور تجارتی سرگرمیاں جاری رکھنے کی اجازت ہو گی۔
حکام کا کہنا ہے کہ اس اقدام کا بنیادی مقصد سرحدی علاقوں میں قانونی تجارت کو فروغ دینا اور مقامی تاجر برادری کو سہولیات فراہم کرنا ہے۔
دیکھیے: امریکہ ایران مذاکرات کے اثرات: عالمی منڈی میں خام تیل کی قیمتوں میں بڑی کمی