لنڈی کوتل: پاک افغان سرحدی علاقے تورخم کے قریب لنڈی کوتل کے دور افتادہ مقام بازار ذخہ خیل اور سرصوبی کنڈاو پر پاکستان اور افغانستان کی سرحدی فورسز کے درمیان مسلح جھڑپ کی اطلاعات موصول ہوئی ہیں۔ مقامی ذرائع کے مطابق دونوں جانب سے ایک دوسرے کے ٹھکانوں پر بھاری ہتھیاروں کا استعمال کیا گیا، جس سے سرحدی علاقوں میں شدید خوف و ہراس پھیل گیا۔
سکیورٹی ذرائع کا کہنا ہے کہ فائرنگ کا تبادلہ کافی دیر تک جاری رہا، تاہم ابھی تک کسی جانی نقصان کی کوئی مصدقہ اطلاع موصول نہیں ہوئی ہے۔ واقعے کے فوری بعد طورخم بارڈر پر آمد و رفت اور تجارتی سرگرمیاں متاثر ہوئی ہیں اور دونوں اطراف سے اضافی نفری طلب کر لی گئی ہے۔
واضح رہے کہ پاک افغان سرحد پر حالیہ دنوں میں کشیدگی کے کئی واقعات رپورٹ ہوئے ہیں۔ پاکستانی حکام مسلسل افغان عبوری حکومت پر زور دیتے رہے ہیں کہ وہ اپنی حدود میں سرحدی نظم و ضبط کو برقرار رکھے اور بلا اشتعال فائرنگ کے واقعات کو روکے۔ سکیورٹی فورسز نے علاقے میں پوزیشنیں سنبھال لی ہیں اور صورتحال پر کڑی نظر رکھی جا رہی ہے تاکہ کسی بھی ممکنہ دراندازی یا مزید کشیدگی کا بروقت جواب دیا جا سکے۔
دیکھئیے:مقبوضہ کشمیر: دارالعلوم بابا حیدری ریشی میں رات گئے ہولناک آگ لگنے سے ایک طالب علم جاں بحق، چار زخمی