پاک فضائیہ کا دستہ کثیر ملکی فضائی جنگی مشق “اسپیئرز آف وکٹری-2026” میں شرکت کے لیے سعودی عرب کے کنگ عبدالعزیز ایئر بیس پہنچ گیا ہے۔ اس دستے میں جدید ایف-16 بلاک 52 جنگی طیارے، فضائی و زمینی عملہ شامل ہے، جس نے پاکستان سے سعودی عرب تک طویل فاصلے کی نان اسٹاپ پرواز مکمل کی۔
آئی ایس پی آر کے مطابق “اسپیئرز آف وکٹری-2026” ایک اہم بین الاقوامی فضائی مشق ہے، جس میں سعودی عرب، پاکستان، فرانس، اٹلی، یونان، قطر، بحرین، اردن، برطانیہ اور امریکا کی فضائی افواج حصہ لے رہی ہیں۔ مشق کا مقصد شریک فضائی افواج کے درمیان باہمی تعاون، آپریشنل ہم آہنگی، مشترکہ فہم اور صلاحیتوں میں اضافہ کرنا ہے، جبکہ جدید الیکٹرانک وارفیئر، بڑے فضائی دستوں کی کارروائیاں، نائٹ کامبیٹ آپریشنز اور انٹیگریٹڈ انٹیلیجنس، سرویلنس و ریکانائسنس پر خصوصی توجہ دی جا رہی ہے۔
بیان کے مطابق پاک فضائیہ اس مشق کے ذریعے دوست ممالک کی فضائی افواج کے ساتھ باہمی انٹرآپریبلٹی کو فروغ دینے اور جدید، ٹیکنالوجی سے بھرپور جنگی ماحول میں اپنی آپریشنل تیاری کو جانچنے کا موقع حاصل کر رہی ہے۔ نان اسٹاپ طویل فاصلے کی پرواز پاک فضائیہ کی طویل رینج آپریشنل صلاحیت اور تیز رفتار تعیناتی کی اہلیت کا عملی مظاہرہ ہے۔
مشق کے دوران پاک فضائیہ کے پائلٹس جدید ایویانکس اور بیونڈ وژول رینج صلاحیتوں سے لیس ایف-16 بلاک 52 طیاروں کے ذریعے دیگر ممالک کی جدید جنگی فضائی طاقتوں کے ساتھ مشترکہ فضائی جنگی تربیت میں حصہ لیں گے۔
آئی ایس پی آر کا کہنا ہے کہ “اسپیئرز آف وکٹری-2026” میں پاک فضائیہ کی شرکت علاقائی اور عالمی عسکری تعاون کے عزم کی عکاس ہے، جو نہ صرف اس کی پیشہ ورانہ مہارت بلکہ مختلف اور مشکل جنگی ماحول میں مؤثر انداز میں کام کرنے کی ثابت شدہ صلاحیت کو بھی اجاگر کرتی ہے۔
دیکھیں: پاکستان اور ازبکستان کی اقتصادی شراکت داری، تجارتی ہدف دو ارب ڈالر مقرر