باجوڑ: ضلع باجوڑ کے علاقے کٹ کوٹ میں افغان طالبان کی جانب سے کی گئی گولہ باری کے نتیجے میں خاتون اور دو بچوں سمیت 3 شہری جاں بحق جبکہ 3 افراد شدید زخمی ہو گئے، سکیورٹی ذرائع کے مطابق حملہ بلااشتعال تھا جس میں شہری آبادی کو نشانہ بنایا گیا۔
سکیورٹی ذرائع کے مطابق حملہ ملک شاہین گاؤں پر کیا گیا، جہاں مارٹر گولے گرنے سے قیمتی جانوں کا نقصان ہوا۔ زخمیوں کو فوری طور پر قریبی اسپتال منتقل کیا گیا جہاں ان کی حالت تشویشناک بتائی جا رہی ہے۔
ذرائع کا کہنا ہے کہ افغان طالبان سرحد پار سے شدت پسندوں کو پاکستان میں داخل کرنے کی کوشش کر رہے تھے تاہم پاک فوج کی بروقت کارروائی کے باعث یہ کوشش ناکام بنا دی گئی۔ سکیورٹی حکام کے مطابق ناکامی کے بعد طالبان نے ردعمل میں شہری علاقوں کو نشانہ بنایا۔
پاک فوج نے واقعے کے فوراً بعد مؤثر جوابی کارروائی کرتے ہوئے فائرنگ کے مقام کو تباہ کر دیا اور قریبی افغان چوکیوں کو نشانہ بنایا۔ سکیورٹی ذرائع کے مطابق اس کارروائی میں طالبان کو بھاری جانی نقصان اٹھانا پڑا۔
حکام کا کہنا ہے کہ سرحدی علاقوں میں سکیورٹی مزید سخت کر دی گئی ہے اور شہریوں کے تحفظ کو یقینی بنانے کے لیے اقدامات جاری ہیں۔
واضح رہے کہ پاک افغان سرحد پر حالیہ دنوں میں کشیدگی میں اضافہ دیکھا جا رہا ہے، جہاں سرحد پار حملوں اور جوابی کارروائیوں کے واقعات رپورٹ ہو رہے ہیں۔
