پاکستان کی فعال اقتصادی سفارت کاری کے نتیجے میں عالمی صنعتی حلقوں کا پاکستان کی مینوفیکچرنگ صلاحیتوں پر اعتماد مزید مستحکم ہونے لگا ہے۔ اس سلسلے میں عالمی شہرت یافتہ انجینئرنگ گروپ ‘فائیوز’ کی نمائندہ میشل نے پیرس میں پاکستانی سفیر ممتاز زہرہ بلوچ سے چانسیری میں ملاقات کی، جس کا محور جدید مینوفیکچرنگ، صنعتی جدت اور پائیدار ٹیکنالوجیز میں تعاون کے اسٹریٹجک مواقع رہے۔
یہ ملاقات پاکستان کی اس فعال اقتصادی حکمتِ عملی کو اجاگر کرتی ہے جس کا مقصد محض روایتی تجارت سے ہٹ کر اعلیٰ ٹیکنالوجی شراکت داری کو راغب کرنا ہے۔ فائیوز گروپ جیسے بین الاقوامی انجینئرنگ لیڈر کے ساتھ یہ رابطہ پاکستان میں جدید مینوفیکچرنگ اور صنعتی جدت کے لیے بین الاقوامی اعتماد میں اضافے کی واضح علامت سمجھا جا رہا ہے۔
مذاکرات کے دوران پائیدار ٹیکنالوجیز پر خصوصی توجہ دی گئی، جو کہ جدید صنعت، گرین گروتھ اور مستقبل کے لیے تیار انفراسٹرکچر سے متعلق پاکستان کے پختہ عزم کی عکاسی کرتی ہے۔ ماہرین کا کہنا ہے کہ عالمی انجینئرنگ رہنماؤں کے ساتھ ایسی شراکت داری پاکستان کی صنعتی جدید کاری کے عمل کو مہمیز دے گی، جس سے نہ صرف روزگار کے وسیع مواقع پیدا ہوں گے بلکہ عالمی منڈی میں پاکستان کی برآمدی مقابلہ آرائی میں بھی خاطر خواہ اضافہ ہوگا۔