ایرانی وزارت خارجہ نے تصدیق کی ہے کہ تہران اور واشنگٹن کے درمیان کشیدگی میں کمی اور خطے میں استحکام کے لیے پاکستان کی ثالثی میں بالواسطہ مذاکرات کا سلسلہ جاری ہے۔ ایرانی حکام کے مطابق ان مذاکرات کا بنیادی مقصد فریقین کے درمیان پائے جانے والے شدید تناؤ کو کم کرنا اور خطے میں پائیدار امن کی راہیں تلاش کرنا ہے۔
ترجمان ایرانی وزارت خارجہ نے تفصیلات بتاتے ہوئے کہا کہ دونوں ممالک کے درمیان براہ راست بات چیت نہیں ہو رہی، بلکہ پاکستان ایک کلیدی ثالثی چینل کے طور پر کردار ادا کر رہا ہے۔ ایران کی جانب سے پیش کی جانے والی حالیہ تجویز پر دونوں فریقین نے اپنے اپنے ردعمل اور آراء کا تبادلہ کیا ہے، جس سے سفارتی عمل میں پیش رفت کا اشارہ ملتا ہے۔
ایرانی وزارت خارجہ نے اس امر کی بھی وضاحت کی ہے کہ اگرچہ دونوں ممالک کے درمیان بنیادی اور تزویراتی اختلافات بدستور برقرار ہیں، تاہم رابطے کا یہ سلسلہ منقطع نہیں ہوا۔ تہران کی جانب سے پیش کردہ تجاویز پر امریکا کا جواب موصول ہو چکا ہے، جس پر اس وقت تہران میں اعلیٰ سطح پر غور و خوص کیا جا رہا ہے۔
