گورنر سندھ کامران ٹیسوری نے کہا ہے کہ ایسے افراد یا گروپ سے مذاکرات نہیں کرنے چاہیئں جو پاکستان کی ترقی میں رکاوٹ کا باعث ہیں۔ کراچی میں مزارِ قائد پر حاضری کے بعد میڈیا سے گفتگو میں گورنر سندھ نے کہا کہ پی ٹی آئی کے بعض دوست مذاکرات کو تسلیم نہیں کرتے اور اڈیالہ میں بیٹھا شخص مغرور ہے۔ انہوں نے کہا کہ جس طرح بھارت سے جنگ جیتی گئی، اسی طرح معیشت کی جنگ بھی جیتی جائے گی اور پاکستان معرکہ معیشت کے لیے تیار ہے۔
کامران ٹیسوری نے کہا کہ پاکستان خطے کا اہم ملک بن چکا ہے، اسلام آباد طاقت کا مرکز بن گیا ہے اور پاکستان سعودی عرب میں محافظ کا کردار ادا کر رہا ہے۔ انہوں نے کارپوریٹ ٹیکس آفس لاہور کی کارروائیوں کا ذکر کرتے ہوئے کہا کہ دو ارب 64 کروڑ روپے کے ٹیکس واجبات وصول کیے گئے ہیں۔
گورنر سندھ نے فیلڈ مارشل کی پالیسی اور عسکری حکمت عملی کو پاکستان کے اعتماد کی بحالی میں اہم قرار دیا۔ انہوں نے قومی ایئرلائن کی نجکاری کے عمل کو گیم چینجر قرار دیتے ہوئے کہا کہ دو دہائیوں بعد یہ عمل شفاف ہے۔
دیکھیں: کراچی میں تمام مکاتبِ فکر کے علما کا اجلاس، پاکستان میں مسلح جدوجہد کی متفقہ مذمت
