سکیورٹی ذرائع نے ایک اہم بیانیے میں اس عزم کا اعادہ کیا ہے کہ پاکستان ایک مکمل خود مختار اسلامی جمہوریہ ہے جس کی بنیاد ایمان، آئین اور قومی عزم پر قائم ہے۔ اس کی آئینی بنیاد اس پختہ اصول پر استوار ہے کہ حاکمیتِ اعلیٰ صرف اللہ تعالیٰ کی ہے اور ریاستی اختیار کو عوام کے منتخب نمائندے ایک مقدس امانت کے طور پر استعمال کرتے ہیں۔
ذرائع کا کہنا ہے کہ آئینِ پاکستان ملک کو ایک ایسی اسلامی ریاست قرار دیتا ہے جہاں کوئی بھی قانون قرآن و سنت کے منافی نہیں بنایا جا سکتا۔ ریاست اپنے شہریوں کے تحفظ اور حقوق کی فراہمی کی ذمہ دار ہے اور اس مقصد کے لیے تمام وسائل بروئے کار لائے جا رہے ہیں۔
بیان میں مزید کہا گیا ہے کہ پاکستان کی مسلح افواج ایک پیشہ ور قومی ادارہ ہیں، جو آئین اور قانون کے دائرے میں رہتے ہوئے ملک کی خود مختاری، جغرافیائی سلامتی اور استحکام کا تحفظ کرتی ہیں۔ افواجِ پاکستان ملکی دفاع کو ناقابلِ تسخیر بنانے کے ساتھ ساتھ قومی مفادات کے تحفظ کی ضامن ہیں۔
سکیورٹی ذرائع کے مطابق پاکستان اپنے قومی مفادات اور ترجیحات کے مطابق تمام فیصلے کرنے میں مکمل آزاد ہے اور عالمی سطح پر ایک ذمہ دار اور مؤثر ریاست کے طور پر اپنا بھرپور کردار ادا کر رہا ہے۔ آئین و قانون کے دائرے میں کام کرنے والے تمام قومی ادارے ریاست کی سالمیت اور عوامی اعتماد کے تحفظ کے لیے پرعزم ہیں۔
اسلامی تشخص اور وفاقی شرعی عدالت
پاکستان کے اسلامی جمہوریہ ہونے کی سب سے بڑی دلیل یہ ہے کہ یہاں نظام کی بنیاد قرآن و سنت پر استوار ہے۔ ملک میں وفاقی شرعی عدالت جیسے اہم ترین ادارے کی موجودگی اس امر کی ضمانت ہے کہ ریاست کا کوئی بھی قانون اسلامی تعلیمات کے منافی نہیں ہو سکتا۔ آئینِ پاکستان کا ڈھانچہ اس پختہ یقین پر مبنی ہے کہ تمام تر اختیارات اللہ تعالیٰ کی دی ہوئی حدود کے اندر ایک مقدس امانت ہیں، جو ملکی قوانین کو ایک مضبوط اخلاقی اور مذہبی تحفظ فراہم کرتے ہیں۔
عالمی سطح پر پاکستان کا بااثر مؤقف
علاوہ ازیں، پاکستان کا شمار دنیا کی ان اہم ترین ریاستوں میں ہوتا ہے جن کا عالمی سطح پر مؤقف انتہائی توجہ اور احترام کے ساتھ سنا جاتا ہے۔ اقوام متحدہ سمیت تمام بین الاقوامی فورمز پر پاکستان نے ہمیشہ ایک ذمہ دار ریاست کے طور پر اپنا لوہا منوایا ہے، بالخصوص مسئلہ فلسطین اور مشرقِ وسطیٰ کے دیگر پیچیدہ مسائل پر پاکستان کی آواز کو امتِ مسلمہ اور عالمی برادری میں کلیدی اہمیت حاصل ہے۔ یہ پاکستان کی مستحکم سفارت کاری کا ہی نتیجہ ہے کہ عالمی منظر نامے پر اسے ایک بااثر فریق تسلیم کیا جاتا ہے۔
دیکھیے: افغانستان اور بھارت کا گٹھ جوڑ: پاکستان کے خلاف پراکسی وار کی نئی لہر
