پاکستان کی آبی سلامتی کو لاحق خطرات کے پیشِ نظر عالمی قانونی فورمز پر رجوع کرنے سے متعلق درخواست سماعت کے لیے مقرر کر دی گئی ہے۔ اسلام آباد ہائیکورٹ میں پانی کے حق کے تحفظ سے متعلق قانونی جنگ کے تحت چناب بیاس لنک ٹنل کیس کی سماعت مقرر کی گئی ہے۔
چیف جسٹس اسلام آباد ہائیکورٹ سرفراز ڈوگر 16 ستمبر کو جوڈیشل ایکٹوازم پینل کی اس درخواست پر سماعت کریں گے۔ رجسٹرار آفس کی جانب سے کیس کو 16 ستمبر کی تاریخ پر سماعت کے لیے مقرر کرتے ہوئے کاز لسٹ جاری کر دی گئی ہے۔
درخواست میں عدالت سے استدعا کی گئی ہے کہ انڈس واٹرز ٹریٹی پر فوری عملدرآمد کے لیے حکومت عالمی قانونی فورمز سے فوری طور پر رجوع کرے۔ واضح رہے کہ اسلام آباد ہائیکورٹ پہلے ہی اس معاملے پر وفاقی حکومت سے تفصیلی جواب طلب کر چکی ہے۔
درخواست میں مؤقف اختیار کیا گیا ہے کہ بھارت کا چناب کا پانی موڑنے کا منصوبہ پاکستان کے لیے سنگین خطرہ ہے اور اس سے ملک کی آبی سلامتی داؤ پر لگ سکتی ہے۔ درخواست گزاروں کے مطابق حکومت کی اس معاملے پر خاموشی بنیادی حقوق کی خلاف ورزی کے مترادف ہے، اسی بنیاد پر عدالت سے فوری مداخلت کی استدعا کی گئی ہے تاکہ پاکستان کے پانی کے حق کا مؤثر تحفظ یقینی بنایا جا سکے۔