کراچی میں کھیلے گئے پہلے ٹی ٹوئنٹی میچ میں پاکستان ویمنز کرکٹ ٹیم نے زمبابوے کو 153 رنز کے بڑے مارجن سے شکست دے دی۔ اس فتح کے ساتھ ہی پاکستان کو تین میچوں کی سیریز میں 0-1 کی برتری حاصل ہو گئی ہے۔ پاکستان ویمنز ٹیم نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 237 رنز بنائے جو کہ ٹی ٹوئنٹی انٹرنیشنل میں ٹیم کا سب سے بڑا اسکور ہے۔
پاکستان کی جانب سے اوپنر عائشہ ظفر نے شاندار کارکردگی کا مظاہرہ کرتے ہوئے محض 47 گیندوں پر سنچری مکمل کی۔ انہوں نے 102 رنز کی ناقابلِ شکست اننگز کھیلی جس میں 15 چوکے اور 2 چھکے شامل تھے۔ عائشہ ظفر اب پاکستان کی جانب سے ویمنز ٹی ٹوئنٹی انٹرنیشنل میں تیز ترین سنچری بنانے والی بیٹر بن گئی ہیں۔ دیگر بیٹرز میں عالیہ ریاض نے 23 گیندوں پر 48 رنز اور گل فیروزہ نے 37 رنز کی اننگز کھیل کر مجموعے میں اہم اضافہ کیا۔
ہدف کے تعاقب میں زمبابوے ویمنز ٹیم پاکستانی باؤلرز کے سامنے ریت کی دیوار ثابت ہوئی اور پوری ٹیم 18.2 اوورز میں 84 رنز بنا کر ڈھیر ہو گئی۔ زمبابوے کی جانب سے نتاشا ٹومبا 24 رنز بنا کر نمایاں رہیں۔ پاکستان کی طرف سے فاطمہ ثناء نے 3 جبکہ سعدیہ اقبال اور نتالیہ پرویز نے 2، 2 وکٹیں حاصل کیں۔