افغانستان کے مختلف سرحدی صوبوں بشمول لغمان، کنڑ اور پکتیکا کے علاقوں میں پاکستانی فضائیہ کی جانب سے وسیع پیمانے پر بمباری کی اطلاعات موصول ہوئی ہیں۔ ایچ ٹی این ذرائع کے مطابق ان حملوں میں طالبان کے عسکری مراکز اور سرحدی بٹالینز کو نشانہ بنایا گیا ہے، جبکہ آماج نیوز نے بھی آج کے ان فضائی کاروائیوں کی تصدیق کر دی ہے۔
تفصیلات کے مطابق آج دوپہر کے وقت پاکستانی طیاروں نے صوبہ لغمان کے علاقے گمبیری میں واقع سیلاب فصل پر فضائی حملے کیے۔ اسی تسلسل میں صوبہ کنڑ کے اضلاع ناری اور گشتہ بھی شدید بمباری کی زد میں آئے۔ ذرائع کا کہنا ہے کہ یہاں پانچویں بارڈر بٹالین کے ٹھکانوں کو نشانہ بنایا گیا ہے، جہاں سے ہلاک اور زخمی ہونے والے اہلکاروں کو فوری طور پر جلال آباد منتقل کر دیا گیا ہے۔
علاوہ ازیں افغانستان کے جنوبی صوبوں پکتیا کے ضلع ارگون اور پکتیکا کے علاقے شکین میں بھی فضائی کاروائیاں کی گئی ہیں، جہاں طالبان کے مراکز کو نشانہ بنایا گیا ہے۔ ان حملوں کے بعد پاک افغان سرحد پر سکیورٹی کی صورتحال مزید کشیدہ ہو گئی ہے۔ تاحال طالبان جانب سے ان کاروائیوں پر کوئی باضابطہ موقف سامنے نہیں آیا ہے۔
دیکھیے: اب ہماری تمہاری کھلی جنگ ہے؛ خواجہ آصف کا افغان طالبان رجیم کو سخت پیغام
