اسلام آباد: سعودی وزیر خارجہ شہزادہ فیصل بن فرحان نے وزیراعظم شہباز شریف سے اہم ملاقات کی، جس میں پاکستان نے سعودی عرب کے ساتھ مکمل یکجہتی اور تعاون کے عزم کا اعادہ کیا۔
وزیراعظم ہاؤس میں ہونے والی ملاقات میں نائب وزیراعظم و وزیر خارجہ اسحاق ڈار اور مشیر قومی سلامتی لیفٹیننٹ جنرل محمد عاصم ملک بھی شریک تھے۔ اعلامیے کے مطابق ملاقات خوشگوار اور دوستانہ ماحول میں ہوئی جس میں خطے کی موجودہ صورتحال، بالخصوص مشرق وسطیٰ کی کشیدگی اور امن و استحکام پر تفصیلی تبادلہ خیال کیا گیا۔
وزیراعظم شہباز شریف نے خادم الحرمین الشریفین شاہ سلمان بن عبدالعزیز اور ولی عہد محمد بن سلمان کیلئے نیک خواہشات کا اظہار کرتے ہوئے حالیہ بحران میں سعودی قیادت کے تحمل اور دانشمندانہ طرز عمل کو سراہا۔ انہوں نے سعودی وزیر خارجہ کو ایران اور امریکا کے درمیان کشیدگی کم کرنے کیلئے پاکستان کی جاری سفارتی کوششوں سے بھی آگاہ کیا۔
اعلامیے کے مطابق وزیراعظم نے مسلم امہ میں سعودی عرب کے قائدانہ کردار کو اجاگر کرتے ہوئے اسلامی ممالک کے درمیان اتحاد و یکجہتی کی ضرورت پر زور دیا، جبکہ سعودی وزیر خارجہ نے بھی پاکستان کی سفارتی کوششوں کو سراہتے ہوئے خطے میں امن کیلئے تعاون جاری رکھنے کی یقین دہانی کرائی۔
دونوں ممالک نے اس بات پر اتفاق کیا کہ خطے میں امن و استحکام کیلئے قریبی رابطے اور مشترکہ کوششیں جاری رکھی جائیں گی۔
بعد ازاں وزیراعظم شہباز شریف سے ترکیہ اور مصر کے وزرائے خارجہ نے بھی ملاقات کی، جہاں انہیں پرتپاک استقبال کیا گیا اور علاقائی صورتحال پر مشاورت کی گئی۔
دیکھئیے:مصر اور ترکیہ کے بعد سعودی وزیر خارجہ بھی پاکستان پہنچ گئے، چار ملکی اجلاس آج ہو گا