وزیراعظم شہباز شریف نے کہا ہے کہ پاکستان اور چین آہنی بھائی ہیں اور دونوں ممالک کے درمیان ہر موسم میں برقرار رہنے والی مثالی اسٹریٹیجک شراکت داری قائم ہے۔
چین کے نئے سال کے آغاز پر چینی قیادت اور عوام کے نام جاری کردہ اپنے خصوصی پیغام میں وزیراعظم نے کہا کہ پاکستانی قوم اپنے چینی بھائیوں کی صحت، کامیابی اور مستقل ترقی کے لیے دعاگو ہے۔ انہوں نے چین کے نئے سال (لیونر نیو ایئر) کو دونوں ممالک کے درمیان دوستی اور تعاون کی تجدید کا موقع قرار دیا۔
وزیراعظم شہباز شریف نے چینی کیلنڈر کے حوالے سے گفتگو کرتے ہوئے کہا کہ “اس سال کا علامتی نشان ‘گھوڑا’ ہے، جو توانائی، ہمت اور تیز رفتاری کی علامت سمجھا جاتا ہے۔” انہوں نے مزید کہا کہ یہ اقدار پاکستان اور چین کی مشترکہ ترقی کی عکاس ہیں اور ہمیں امید ہے کہ نیا سال ہماری لازوال دوستی کو مزید بلندیوں تک لے جائے گا۔
اپنے پیغام میں وزیراعظم نے امن، ترقی اور علاقائی روابط کے فروغ کے عزم کا اعادہ کرتے ہوئے کہا کہ پاک چین شراکت داری خطے کے استحکام میں کلیدی اہمیت رکھتی ہے۔ انہوں نے چینی عوام کے لیے اپنی نیک خواہشات کا اظہار کرتے ہوئے اس یقین کا اظہار کیا کہ آنے والے وقت میں دونوں ممالک کے درمیان اقتصادی اور سماجی روابط مزید مستحکم ہوں گے۔
