پاکستان کے وزیرِ اعظم شہباز شریف 23 سے 26 مئی تک چین کا 4 روزہ باقاعدہ سرکاری دورہ کریں گے۔ بیجنگ میں چینی وزارتِ خارجہ کے ترجمان گو جیاکون نے اس اہم دورے کا باقاعدہ اعلان کرتے ہوئے بتایا کہ یہ دورہ دونوں ممالک کے مابین سفارتی تعلقات کی 75 ویں سالگرہ کے تاریخی موقع پر ہو رہا ہے، جسے پاک چین تزویراتی تعلقات میں ایک اہم اعلیٰ سطحی تبادلہ قرار دیا جا رہا ہے۔
ترجمان کے مطابق دورے کے دوران چین کے صدر شی جن پنگ وزیرِ اعظم شہباز شریف سے خصوصی ملاقات کریں گے جبکہ چینی پریمیئر لی چیانگ ان کے ساتھ وفود کی سطح پر تفصیلی مذاکرات کریں گے۔ دونوں ممالک کی قیادت دوطرفہ تعلقات کی موجودہ صورتحال، خطے کی سیکیورٹی اور باہمی دلچسپی کے اہم عالمی و علاقائی امور پر گہرائی سے تبادلۂ خیال کرے گی۔
چینی ترجمان نے واضح کیا کہ یہ اعلیٰ سطحی بات چیت نئی بین الاقوامی صورتحال کے تحت چین پاکستان تعلقات کی آئندہ سمت کے تعین میں انتہائی اہم کردار ادا کرے گی۔ اپنے اس مصروف دورے کے دوران وزیرِ اعظم شہباز شریف پاک چین سفارتی تعلقات کی 75 ویں سالگرہ کے حوالے سے منعقدہ خصوصی تقریب میں بھی شرکت کریں گے، جبکہ وہ چین کے اقتصادی طور پر اہم صوبے ژی جیانگ کا دورہ بھی کریں گے۔
چینی وزارتِ خارجہ کے بیان میں پاک چین روابط کی پائیداری کا تذکرہ کرتے ہوئے کہا گیا ہے کہ گزشتہ 75 برسوں کے دوران دونوں ممالک کے تعلقات ہر آزمائش پر پورے اترے ہیں اور دونوں دھرتیوں نے مختلف شعبوں میں قریبی تعاون کو فروغ دیا ہے، خصوصاً چین پاکستان اقتصادی راہداری (سی پیک) کے تحت حالیہ برسوں میں نمایاں اور تزویراتی پیش رفت ہوئی ہے۔
چین نے اس امید کا اظہار کیا ہے کہ وزیرِ اعظم پاکستان کا یہ دورہ دونوں ممالک کے مابین روایتی دوستی کو مزید مضبوط کرنے، ہمہ جہت تعاون کو گہرا کرنے اور باہمی اشتراک کو نئی بلندیوں تک لے جانے کا باعث بنے گا۔
دیکھیے: پاک چین تعلقات کے 75 سال؛ اسحاق ڈار کا خطاب، قومی اسمبلی میں متفقہ قرارداد منظور