وزیراعظم محمد شہباز شریف ایک اعلیٰ سطح کے وفد کے ہمراہ سعودی عرب، قطر اور ترکیہ کے چار روزہ سرکاری دورے پر روانہ ہو گئے ہیں۔ 15 سے 18 اپریل تک جاری رہنے والے اس دورے کا مقصد دوطرفہ معاشی تعاون کو فروغ دینا اور علاقائی امن و سلامتی کے حوالے سے اہم عالمی اسٹیک ہولڈرز کے ساتھ مشاورت کرنا ہے۔
وزارتِ خارجہ کی جانب سے جاری کردہ تفصیلات کے مطابق وزیراعظم کے دورہ سعودی عرب اور قطر کی نوعیت دوطرفہ ہے۔ ان دوروں کے دوران وزیراعظم دونوں برادر ممالک کی اعلیٰ قیادت سے ملاقاتیں کریں گے، جن میں معاشی شراکت داری، سرمایہ کاری اور باہمی تعاون کے جاری منصوبوں پر تبادلہ خیال کیا جائے گا۔ ذرائع کا کہنا ہے کہ ان ملاقاتوں میں خطے کی مجموعی صورتحال اور عالمی امن کے حوالے سے مشترکہ حکمتِ عملی پر بھی غور ہوگا۔
عالمی رہنماؤں سے ملاقاتیں
اپنے دورے کے دوسرے مرحلے میں وزیراعظم شہباز شریف ترکیہ پہنچیں گے، جہاں وہ ‘پانچویں انطالیہ ڈپلومیسی فورم’ میں شریک ہوں گے۔ وزیراعظم فورم کے “لیڈرز پینل” میں دیگر عالمی سربراہان کے ہمراہ پاکستان کا نقطہ نظر پیش کریں گے۔ فورم کی سائیڈ لائنز پر وزیراعظم کی ترک صدر رجب طیب اردوان اور دیگر عالمی رہنماؤں سے ملاقاتیں بھی متوقع ہیں، جن میں کثیر الجہتی سفارت کاری پر زور دیا جائے گا۔
پاکستان کا کلیدی سفارتی کردار
سفارتی ماہرین کے مطابق وزیراعظم کا یہ دورہ ایک ایسے وقت میں ہو رہا ہے جب پاکستان مشرقِ وسطیٰ میں امن کے لیے ایک کلیدی سہولت کار کے طور پر ابھرا ہے۔ دورے کے دوران پاکستان کی ثالثی میں جاری “امریکہ ایران مذاکرات” اور آبنائے ہرمز کی صورتحال پر بھی اہم مشاورت کی جائے گی۔ وزیراعظم کے ہمراہ نائب وزیراعظم و وزیرِ خارجہ اسحاق ڈار، وزیرِ اطلاعات عطاء اللہ تارڑ اور معاون خصوصی طارق فاطمی سمیت اعلیٰ حکام موجود ہیں۔
