اسلام آباد/راولپنڈی: پاکستان تحریک انصاف نے 9 اپریل کو لیاقت باغ میں ہونے والا جلسہ ملتوی کرنے کا فیصلہ کر لیا، جس کی وجہ خطے میں موجودہ صورتحال اور جاری بین الاقوامی سفارتی کوششوں کو قرار دیا گیا ہے۔
پارٹی کی پولیٹیکل کمیٹی کے اہم اجلاس میں وزیراعلیٰ خیبر پختونخوا سمیت سینئر قیادت نے شرکت کی، جہاں ملک کی سیاسی صورتحال اور خصوصاً مشرقِ وسطیٰ میں حالیہ پیش رفت کا تفصیلی جائزہ لیا گیا۔
اجلاس میں امریکا اور ایران کے درمیان دو ہفتے کی جنگ بندی کو مثبت پیش رفت قرار دیتے ہوئے کہا گیا کہ پاکستان اس اہم سفارتی مرحلے میں کلیدی کردار ادا کر رہا ہے، اور 10 اپریل کو اسلام آباد میں متوقع مذاکرات عالمی امن کیلئے انتہائی اہم ہیں۔
پولیٹیکل کمیٹی نے فیصلہ کیا کہ موجودہ بین الاقوامی تناظر میں تمام توجہ سفارتی کوششوں اور امن مذاکرات کی کامیابی پر مرکوز رکھنا ضروری ہے، اسی لیے لیاقت باغ کا جلسہ مؤخر کیا جا رہا ہے۔
ذرائع کے مطابق چیئرمین پی ٹی آئی بیرسٹر گوہر علی خان نے بھی قومی اسمبلی میں اس فیصلے کی تصدیق کی، جبکہ عمران خان نے بیرسٹر سلمان صفدر کے ذریعے پیغام بھجوایا کہ موجودہ حالات میں جلسہ ملتوی کیا جائے۔
دوسری جانب اپوزیشن لیڈر سینیٹ علامہ ناصر عباس نے کہا کہ حکومتی وفد کی جانب سے بھی جلسہ ملتوی کرنے کی درخواست کی گئی تھی، جس کے بعد پی ٹی آئی نے یہ فیصلہ کیا۔
واضح رہے کہ ضلعی انتظامیہ پہلے ہی سیکیورٹی خدشات کے باعث جلسے کی اجازت مسترد کر چکی تھی، ڈپٹی کمشنر راولپنڈی کے مطابق شہر میں دفعہ 144 نافذ ہے اور موجودہ حالات میں جلسہ منعقد کرنا خطرناک ہو سکتا تھا۔
پارٹی کے مطابق جلسے کی نئی تاریخ کا اعلان بعد ازاں مشاورت سے کیا جائے گا۔