بنوں اور لکی مروت میں آرمی، پولیس، سی ٹی ڈی اور دیگر سیکیورٹی فورسز نے خفیہ اطلاعات کی بنیاد پر مشترکہ کارروائیاں کرتے ہوئے بڑے دہشتگرد نیٹ ورکس کو ناکام بنا دیا۔ مختلف آپریشنز میں مجموعی طور پر 17 دہشتگرد ہلاک ہوئے، جن میں متعدد خطرناک اور بدنام زمانہ کمانڈرز بھی شامل ہیں، جبکہ کئی زخمی اور سہولت کار گرفتار کر لیے گئے۔ کارروائیوں نے خطے میں امن و امان کی بحالی کے لیے ریاستی اختیار کو مزید مضبوط کر دیا ہے۔
شیری خیل اور پکہ پہاڑ خیل میں فورسز نے اہم کارروائی کرتے ہوئے 10 دہشتگرد ہلاک اور 5 زخمی کیے، ساتھ ہی ایک سہولت کار کو بھی گرفتار کر لیا گیا۔ یہ آپریشن علاقے میں شدت پسندوں کے منظم نیٹ ورک کو توڑنے کے لیے انتہائی مؤثر ثابت ہوا۔ اسی طرح نصر خیل میں ٹارگٹڈ کارروائی کے دوران ایک مطلوب دہشتگرد کو ہلاک کیا گیا، جب کہ پولیس اور فورسز کو کسی قسم کا جانی نقصان نہیں پہنچا۔
ڈومیل بنوں میں سیکیورٹی فورسز نے 8 گھنٹے طویل مقابلے کے بعد بدنام زمانہ دہشتگرد کمانڈر ’اَریانہ‘ کو ہلاک کر دیا، جس کے خاتمے سے علاقے میں سرگرم ایک بڑا نیٹ ورک عملاً ختم ہو گیا۔ اسی علاقے میں پولیس کی گاڑی پر دہشتگردوں کی فائرنگ کے واقعے میں بھی فورسز نے فوری جوابی کارروائی کرتے ہوئے 6 خارجی دہشتگردوں کو ہلاک کیا اور متعدد کو زخمی کر دیا۔ یہ واقعہ فورسز کی بہادری اور پیشہ ورانہ مہارت کا واضح ثبوت ہے۔
عوامی تعاون بھی ان کارروائیوں کا اہم پہلو رہا۔ ہوید بنوں میں مقامی شہریوں نے پولیس کے ساتھ مل کر دہشتگردوں کے خلاف بھرپور ساتھ دیا، جس سے نہ صرف دہشتگرد پسپا ہوئے بلکہ عوامی اعتماد سے ریاستی قوت مزید مستحکم ہوئی۔ اسی دوران بنوں پولیس کے بی ڈی ایس اسکواڈ نے بسیہ خیل پل پر 8 سے 10 کلو وزنی آئی ای ڈی کو بروقت ناکارہ بنا کر بڑی تباہی کو ٹال دیا۔
آپریشنز کے دوران دہشتگردوں کے دو اہم خارجی کمانڈرز — نیاز علی عرف ’اکاشا‘ اور عبداللّٰہ عرف ’شپونکوئی‘ کی ہلاکت سے شدت پسندوں کی قیادت میں واضح خلا پیدا ہوا ہے، جو مستقبل کی کارروائیوں پر بھی اثر انداز ہوگا۔ مقامی کمیونٹیز نے سیکیورٹی فورسز کے ساتھ مکمل یکجہتی اور تعاون کا اظہار کرتے ہوئے فتنہ خوارج کے خلاف ریاستی اقدامات کی بھرپور حمایت کی ہے۔
آئی جی خیبرپختونخوا نے بنوں ریجن کی فورسز کو خصوصی شاباش دیتے ہوئے کہا ہے: “کوئی دہشتگرد ٹھکانہ باقی نہیں رہے گا، آخری دہشتگرد کے خاتمے تک آپریشن جاری رہے گا۔”
دیکھیں: ڈی آئی خان میں پولیس وین پر آئی ای ڈی دھماکہ؛ 2 جوان شہید ہو گئے