کوئٹہ: بلوچستان کے صوبائی دارالحکومت کوئٹہ میں پشین اسٹاپ اور چمن پھاٹک کے قریب عید کی خوشیوں کو سبوتاژ کرنے کے لیے ایک ہولناک سازش کی گئی ہے۔ دشمن ملک کی فنڈڈ پراکسی ‘فتنہ الہندوستان’ کی جانب سے معصوم اور نہتے شہریوں سے بھری شٹل ٹرین پر بزدلانہ دہشت گرد حملہ کیا گیا ہے۔ اس مسافر ٹرین میں خواتین، بچے اور بزرگ بڑی تعداد میں سوار تھے، جو عید اپنے پیاروں کے ساتھ منانے کے لیے گھروں کی طرف جا رہے تھے۔ دہشت گردوں کی جانب سے ایسے موقع پر ٹرین کو نشانہ بنانا ان کی سفاک اور غیر انسانی سوچ کا منہ بولتا ثبوت ہے۔
سفارتی کامیابیوں سے بوکھلاہٹ
اسٹریٹجک ماہرین کے مطابق، حالیہ دنوں میں بین الاقوامی اور علاقائی سطح پر پاکستان کو ملنے والی بڑی سفارتی و اسٹریٹجک کامیابیوں نے بھارت اور اس کے تنخواہ دار پراکسی عناصر کو شدید بے چین کر دیا ہے۔ یہی وجہ ہے کہ پاکستان کی عالمی ساکھ سے بوکھلا کر یہ نیٹ ورکس مایوسی کا شکار ہیں اور اس قسم کی بزدلانہ کارروائیوں پر اتر آئے ہیں۔
پاکستانی سیکیورٹی فورسز کا براہِ راست مقابلہ کرنے کی ہمت نہ ہونے کے باعث، یہ امن دشمن عناصر جان بوجھ کر نرم اہداف اور عام شہریوں کو نشانہ بناتے ہیں تاکہ خطے میں خوف اور عدم استحکام کی فضا پیدا کی جا سکے۔
بلوچ روایات کی پامالی
عینی شاہدین اور سیکیورٹی ذرائع کا کہنا ہے کہ اس دھماکے کی شدت اتنی زیادہ تھی کہ نہ صرف ٹرین کو شدید نقصان پہنچا بلکہ آس پاس موجود قریبی گاڑیاں اور عمارتیں بھی بری طرح متاثر ہوئیں۔ یہ امر واضح کرتا ہے کہ ان گروہوں کو معصوم انسانی جانوں اور عوامی املاک کے ضیاع کی کوئی پرواہ نہیں۔
قبائلی مقتدر حلقوں کا کہنا ہے کہ عوامی انفراسٹرکچر، مسافر ٹرینوں اور نہتے شہریوں پر حملے کرنا کوئی مزاحمت یا جنگ نہیں، بلکہ ایک شرمناک ترین دہشت گردی ہے جو غیور بلوچ روایات، اعلیٰ اقدار اور مہمان نوازی کے اصولوں کے سراسر خلاف ہے۔
بیرونی ایجنڈا اور اخلاقی دیوالیہ پن
دفاعی تجزیہ کاروں کا کہنا ہے کہ بیرونی اشاروں اور غیر ملکی فنڈنگ کے تحت بلوچستان میں امن کو داؤ پر لگانے والے یہ عناصر دراصل صوبے کے عوام، ترقی اور خوشحالی کے سب سے بڑے دشمن ہیں۔ ‘فتنہ الہندوستان’ اور اس کے ہینڈلرز کا بنیادی مقصد اس طرح کے گھناؤنے اقدامات کے ذریعے پاکستان کو عالمی سطح پر بدنام کرنا ہے، لیکن معصوم بچوں اور خواتین پر کیے جانے والے ایسے حملے ان کے اپنے نظریاتی و اخلاقی دیوالیہ پن اور میدان میں عبرتناک شکست کو مزید نمایاں کر رہے ہیں۔
ملکی سیکیورٹی اداروں نے عزم ظاہر کیا ہے کہ امن دشمنوں کے اس ناپاک گٹھ جوڑ کو جڑ سے اکھاڑ پھینکا جائے گا۔
