کراچی: فلمی دنیا کے سب سے معتبر عالمی میلے “کانز فلم فیسٹیول” کے ریڈ کارپٹ پر پاکستانی اداکارہ صنم سعید نے اپنے شاندار ڈیبیو سے ملک کا نام روشن کر دیا ہے۔ اس تاریخی موقع پر ان کے شوہر اور نامور اداکار محب مرزا نے سوشل میڈیا پر ایک انتہائی جذباتی اور محبت بھرا پیغام شیئر کرتے ہوئے اپنی اہلیہ کو شاندار الفاظ میں خراجِ تحسین پیش کیا ہے۔
محب مرزا نے اپنے آفیشل انسٹاگرام اکاؤنٹ پر صنم سعید کی کانز فیسٹیول سے خوبصورت تصاویر شیئر کیں، جس کے کیپشن میں انہوں نے لکھا کہ “آپ ایک غیر معمولی انسان ہیں اور آپ کو زندگی اتنے خوبصورت انداز میں گزارتا دیکھ کر میں اس قدر مطمئن ہوجاتا ہوں کہ اسے الفاظ میں بیان نہیں کرسکتا۔”
اداکار نے صنم پر فخر کا اظہار کرتے ہوئے مزید لکھا کہ “مجھے آپ پر بے حد فخر ہے کہ آپ نے 79 ویں کانز فلم فیسٹیول کے ریڈ کارپٹ پر چل کر پاکستان کی نمائندگی کی، فلموں میں جنوبی ایشیائی خواتین کے کردار کو عزت دی اور پاکستان کی لیجنڈری اداکارہ و ہدایت کارہ میڈم شمیم آرا کو خوبصورت خراجِ تحسین پیش کیا۔” انہوں نے صنم سعید کے لیے دعائیہ کلمات کہے اور ان کے مستقبل کے لیے نیک خواہشات کا اظہار بھی کیا۔
واضح رہے کہ اس سال کانز فلم فیسٹیول میں اداکارہ صنم سعید اور پاکستان کے معروف فیشن ڈیزائنر حسین رہر نے ایک ساتھ اپنا ڈیبیو کیا ہے، جہاں صنم کے انداز اور لباس کو عالمی سطح پر بے حد سراہا جا رہا ہے۔ یاد رہے کہ سال 2018 میں پاکستان کی نامور سپر اسٹار ماہرہ خان کانز کے ریڈ کارپٹ پر ڈیبیو کرنے والی پہلی پاکستانی اداکارہ تھیں، اور اب صنم سعید نے اس عالمی فورم پر پاکستان کا مان بڑھایا ہے۔
