اسلام آباد: وزیراعظم محمد شہباز شریف نے سعودی عرب کے علاقے راس تنورہ میں پیش آنے والے افسوسناک ہیلی کاپٹر حادثے میں 14 سعودی شہریوں کے جاں بحق ہونے پر گہرے دکھ اور افسوس کا اظہار کیا ہے۔
ایکس پر جاری اپنے تعزیتی پیغام میں وزیراعظم نے حادثے پر شدید رنج کا اظہار کرتے ہوئے کہا کہ پاکستان کے عوام اور حکومت کی جانب سے خادم الحرمین الشریفین شاہ سلمان بن عبدالعزیز آل سعود، ولی عہد اور وزیراعظم شہزادہ محمد بن سلمان، جاں بحق ہونے والے افراد کے پسماندگان اور سعودی عرب کے برادر عوام سے دلی تعزیت اور ہمدردی کا اظہار کرتے ہیں۔
انہوں نے مزید کہا کہ غم کی اس گھڑی میں پاکستان اپنے سعودی بھائیوں اور بہنوں کے ساتھ مکمل یکجہتی کے ساتھ کھڑا ہے۔
سعودی پریس ایجنسی ایس پی اے نے ملکی وزارت توانائی کے حوالے سے تصدیق کی ہے کہ تباہ ہونے والا ہیلی کاپٹر سعودی عرب کی سرکاری آئل کمپنی ارامکو کی ملکیت تھا، جو اتوار کے روز راس تنورہ کے مقام پر گر کر تباہ ہوا۔ حادثے کے نتیجے میں ہیلی کاپٹر میں سوار تمام 14 افراد جان کی بازی ہار گئے۔
سعودی میڈیا کے مطابق حادثے کی اطلاع ملتے ہی امدادی ٹیمیں فوری طور پر جائے وقوعہ پر پہنچیں اور ریسکیو آپریشن مکمل کیا۔ سعودی تحقیقاتی اداروں نے ہیلی کاپٹر گرنے کی وجوہات کا تعین کرنے کے لیے باقاعدہ انکوائری کا آغاز کر دیا ہے۔
