سری لنکا موسلا دھار بارش، سیلاب اور لینڈ سلائیڈنگ کے باعث شدید تباہی سے دوچار ہے۔ تازہ ترین اطلاعات کے مطابق ہلاکتوں کی تعداد 123 ہوگئی ہے جب جبکہ لاپتا ہونے والوں کی تعداد 130 سے تجاوز کرگئی ہے۔
اعدادوشمار کے مطابق شمالی اور مشرقی اضلاع میں ایک ہفتے سے جاری بارشوں نے تباہی مچا دی ہے، متعدد مقامات پر 300 ملی میٹر تک بارش ریکارڈ کی گئی۔ زیادہ تر اموات لینڈ سلائینڈنگ کے نیتجےمیں ہوئی ہیں اور اسکے ساتھ ساتھ سینکڑوں مکانات بھی تباہ ہو چکے ہیں۔
سری لنکن حکام کے مطابق 44 ہزار سے زائد افراد بے گھر ہو چکے ہیں جنہیں اسکولوں، کھیلوں کے میدانوں اور سرکاری عمارتوں میں بنائے گئے عارضی کیمپوں میں پناہ دی گئی ہے۔ اسی طرح کولمبو کے کرکٹ اسٹیڈیم کو بھی ہنگامی بنیادوں پر پناہ گاہ میں تبدیل کر دیا گیا ہے۔
اطلاعات کے مطابق موسمی حالات کے باعث بجلی اور شاہراہیں بند ہیں۔ فوج، پولیس اور رفاہی ادارے مسلسل ریسکیو کارروائیوں میں مصروفِ عمل ہیں اور ہیلی کاپٹرز کے ذریعے پھنسے ہوئے افراد کو نکالا جا رہا ہے۔
سری لنکن محکمہ آبی وسائل نے خبردار کیا ہے کہ کیلانی دریا میں پانی کی سطح خطرناک حد تک بلند ہو رہی ہے، جس سے کولمبو اور اس کے گردونواح کے نشیبی علاقوں میں سیلاب کا خطرہ پیدا ہو گیا ہے۔ موسمیاتی ماہرین کے مطابق سمندری طوفان ’دتواہ‘ اب کمزور پڑتا ہوا بھارت کے جنوبی ساحلی علاقوں کی طرف بڑھ رہا ہے، لیکن سری لنکا میں بارشوں کے جاری رہنے کا امکان ہے، جس سے متاثرہ علاقوں کی صورت حال مزید سنگین ہو سکتی ہے۔