سپریم کورٹ نے اہم فیصلہ سناتے ہوئے حکومت کو بانی پی ٹی آئی عمران خان کو فوری طور پر شفا ہسپتال منتقل کرنے اور تمام ضروری طبی ٹیسٹ کروانے کا حکم دے دیا ہے۔ عدالت عظمیٰ نے جیل انتظامیہ اور متعلقہ حکام کو ہدایت کی ہے کہ عمران خان کے علاج میں کسی قسم کی تاخیر یا غفلت نہ برتی جائے۔
یہ حکم اس وقت سامنے آیا جب عدالت میں بانی پی ٹی آئی عمران خان کے ذاتی معالجین اور اہل خانہ تک رسائی کے کیس کی سماعت شروع ہوئی۔
سماعت کے دوران عدالت کو بتایا گیا کہ بانی پی ٹی آئی کا مکمل علاج اور انجیو گرافی جیسے اہم ٹیسٹ جیل کے اندر ممکن نہیں ہیں۔ اس پر سپریم کورٹ نے شفا ہسپتال میں منتقلی کا حکم جاری کرتے ہوئے ایڈووکیٹ جنرل کو ہدایت کی کہ ہسپتال میں علاج کے ساتھ ساتھ تمام تر میڈیکل ریکارڈ آئندہ سماعت پر جمع کروایا جائے۔
اس موقع پر حکومتی مؤقف ہے کہ بانی پی ٹی آئی کو جیل میں تمام ضروری طبی سہولیات دی جا رہی ہیں اور ان کی صحت کا مکمل خیال رکھا جا رہا ہے۔
سپریم کورٹ کے اس حکم کے بعد انتظامیہ نے بانی پی ٹی آئی کو شفا ہسپتال منتقل کرنے اور ضروری طبی معائنے کے لیے اقدامات شروع کر دیے ہیں، جبکہ عدالت نے تمام فریقین سے ملاقاتوں کا مکمل ریکارڈ اور رپورٹس طلب کر لی ہیں۔