گورنر گلگت بلتستان سید مہدی شاہ نے خیبر پختونخوا میں آئینی ایمرجنسی کے نفاذ کا خیرمقدم کرتے ہوئے کہا ہے کہ یہ فیصلہ مشکل ضرور تھا، تاہم ان کے خیال میں صوبے کو بدانتظامی، کرپشن اور سیاسی انتشار سے بچانے کے لیے ناگزیر تھا۔
گورنر ہاؤس گلگت بلتستان سے جاری بیان میں سید مہدی شاہ نے کہا کہ گزشتہ چند برسوں کے دوران خیبر پختونخوا کو طرز حکمرانی کے حوالے سے مشکلات کا سامنا رہا، جبکہ صوبے کی ترقی کے بجائے احتجاج اور سیاسی افراتفری کو فروغ ملا۔
انہوں نے کہا کہ خیبر پختونخوا کے عوام امن، روزگار اور ترقی کے خواہاں ہیں، نہ کہ سیاسی انتشار کے۔ ان کا کہنا تھا کہ انہیں امید ہے کہ آئینی ایمرجنسی کے بعد صوبے میں میرٹ کی بحالی، کرپشن کے خاتمے اور ترقیاتی عمل کو آگے بڑھانے میں مدد ملے گی۔
سید مہدی شاہ نے مزید کہا کہ انہیں یقین ہے کہ خیبر پختونخوا ایک بار پھر ترقی کی راہ پر گامزن ہوگا اور پاکستان کی مجموعی ترقی میں اہم کردار ادا کرے گا۔
