افغانستان میں جاری فارسی اور دیگر لسانی شناختوں کے خلاف جنگ نے اب بین الاقوامی سفارتی سطح تک اپنا دائرہ وسیع کر لیا ہے۔ ذرائع نے تصدیق کی ہے کہ طالبان نے ماسکو میں اپنے سفارت خانے کے سائن بورڈ سے فارسی زبان کو مکمل طور پر ہٹا دیا ہے۔ مذکورہ اقدام ایسے وقت میں سامنے آیا ہے جب طالبان نے گزشتہ کئی ماہ سے افغانستان کے اندر فارسی زبان کے استعمال کو سرکاری اداروں، تعلیمی نظام اور عدالتی دستاویزات سے یکے بعد دیگرے ہٹانے کا سلسلہ شروع کر رکھا ہے۔
لسانی تعصب اور بین الاقوامی تصدیق
اس موقع پر ماہرینِ لسانیات ڈاکٹر عابدہ حسین کا کہنا ہے کہ یہ محض ایک بورڈ کی تبدیلی نہیں ہے۔ بلکہ یہ ایک واضح پیغام ہے کہ طالبان کی فارسی مخالف مہم اب ملکی حدود سے نکل کر ان کی بین الاقوامی نمائندگی تک پھیل چکی ہے۔ یہ ایک ایسی پالیسی کی بین الاقوامی سطح پر پہلی عملی تصدیق ہے، جس کا مقصد افغانستان کی کثیر لسانی شناخت کو یک رخی اور نظریاتی رنگ میں ڈھالنا ہے۔”
ویڈیو میں واضح انداز میں دیکھا جاسکتا ہے طالبان نے روس میں اپنے سفارت خانے کے رہنماء بورڈ سے فارسی زبان ہٹا دی.
قانونی و انسانی حقوق کے تناظر میں
بین الاقوامی قوانین، بالخصوص اقوام متحدہ کے چارٹر برائے انسانی حقوق اور اقلیتی حقوق کے تحفظ سے متعلق معاہدوں کی رو سے، یہ اقدام سنگین خلاف ورزی تصور کیا جا سکتا ہے۔ انسانی حقوق کی سرگرم وکیل مریم رحیمی کا مؤقف ہے کہ بین الاقوامی قوانین دونوں شہریوں کو ان کی مادری زبان میں تعلیم، عدالتی کاروائی اور سرکاری رابطے کا حق دیتے ہیں۔ طالبان کا مذکورہ قدم نہ صرف ملک کی داخلی قانونی کڑیوں کو نظر انداز کرتا ہے، بلکہ بین الاقوامی برادری کے سامنے یہ سوال پیش کرتا ہے کہ کیا افغانستان میں اب کوئی قانونی نظام باقی رہ گیا ہے؟
مقامی ردعمل
افغانستان میں بالخصوص فارسی بولنے والے صوبوں میں، اس خبر نے مزید خدشات پیدا کر دیے ہیں۔ ایک کابل کے رہائشی نے نام ظاہر نہ کرنے کی شرط پر بتایا کہ پہلے ہمارے بچوں کی کتابوں سے فارسی کے اسباق ہٹائے گئے، پھر سرکاری دفاتر کے نام بدلے گئے، اب تو ہم بین الاقوامی سطح پر بھی اپنی زبان کھو رہے ہیں۔ یہ صرف زبان نہیں، ہماری تاریخ اور شناخت مٹائی جا رہی ہے۔
بین الاقوامی ردعمل
اب تک روسی وزارت خارجہ یا دیگر بین الاقوامی اداروں کی جانب سے اس واقعے پر کوئی سرکاری بیان سامنے نہیں آیا ہے۔ تاہم یورپی یونین کی جانب سے گزشتہ ہفتے جاری کردہ ایک بیان میں افغانستان میں “اقلیتوں اور لسانی گروہوں کے حقوق میں مسلسل کمی” پر تشویش کا اظہار کیا گیا تھا۔