واشنگٹن: امریکی صدر ڈونلڈ ٹرمپ نے ایران کے ساتھ مذاکرات میں ثالثی اور آبنائے ہرمز کھولنے کے تناظر میں پاکستان کے کردار کو سراہتے ہوئے وزیراعظم شہباز شریف اور فیلڈ مارشل عاصم منیر کو خراج تحسین پیش کیا ہے۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ “پاکستان کا شکریہ، اس کے وزیر اعظم اور فیلڈ مارشل کا شکریہ، دونوں زبردست شخصیات ہیں”، جسے سفارتی حلقوں میں پاکستان کے کردار کی کھلی تعریف قرار دیا جا رہا ہے۔
امریکی صدر نے ایک اور بیان میں سعودی عرب، متحدہ عرب امارات اور قطر کا بھی شکریہ ادا کرتے ہوئے کہا کہ ان ممالک نے حالیہ پیشرفت میں بہادری اور تعاون کا مظاہرہ کیا۔
یہ بیانات ایسے وقت میں سامنے آئے ہیں جب ایران نے لبنان میں جنگ بندی کے بعد آبنائے ہرمز کو تجارتی جہازوں کے لیے کھولنے کا اعلان کیا ہے، جسے خطے میں کشیدگی کم ہونے کی اہم علامت قرار دیا جا رہا ہے۔
ایرانی وزیر خارجہ عباس عراقچی نے اپنے بیان میں کہا کہ جنگ بندی کے تناظر میں آبنائے ہرمز سے تمام تجارتی بحری جہازوں کی آمد و رفت کو مکمل طور پر کھول دیا گیا ہے اور یہ سلسلہ جنگ بندی کے باقی عرصے تک جاری رہے گا۔
تجزیہ کاروں کے مطابق پاکستان کی جانب سے امریکا اور ایران کے درمیان ثالثی کے کردار نے نہ صرف کشیدگی کم کرنے میں مدد دی بلکہ عالمی سطح پر اسلام آباد کی سفارتی اہمیت کو بھی اجاگر کیا ہے۔
واضح رہے کہ حالیہ ہفتوں میں پاکستان نے امریکا اور ایران کے درمیان مذاکرات کی میزبانی اور سہولت کاری کی، جسے عالمی سطح پر مثبت پیشرفت کے طور پر دیکھا جا رہا ہے۔
