ماہ رنگ بلوچ کی گرفتاری اور بلوچستان کی موجودہ صورتحال پر کالعدم تحریکِ طالبان پاکستان (ٹی ٹی پی) کے حالیہ بیان نے ملک دشمن عناصر کے مابین قائم گہرے روابط اور نظریاتی گٹھ جوڑ کو پوری طرح طشت از بام کر دیا ہے۔ سوشل میڈیا پر جاری ہونے والے ایک ویڈیو پیغام میں ٹی ٹی پی کے مفتی طارق محسود نے ماہ رنگ بلوچ کی کھل کر حمایت کی ہے، جس سے ان خدشات کو تقویت ملی ہے کہ یہ تمام قوتیں ملک و ملت کے خلاف ایک ہی ایجنڈے پر کاربند ہیں۔
اداروں کے خلاف اشتراکیت
سکیورٹی ماہرین کے مطابق اس ویڈیو میں ماہ رنگ بلوچ کو مظلوم بنا کر پیش کرنا اور عوام سے ان کی تائید کی اپیل کرنا دراصل عام شہریوں کو ریاست اور قومی سلامتی کے اداروں کے خلاف اکسانے کی ایک گہری سازش ہے۔
ٹی ٹی پی اور بلوچ انتہا پسند بظاہر مختلف نظریات کا پرچار کرتے ہیں، لیکن ریاستی رٹ کو چیلنج کرنے، اداروں کو نشانہ بنانے اور عوام میں مایوسی پھیلانے کے معاملے پر دونوں کا ہدف اور بیانیہ ایک ہی ہے۔ یہ گٹھ جوڑ ثابت کرتا ہے کہ دونوں گروہ ملک کے امن کو سبوتاژ کرنے کے لیے ایک دوسرے کے لیے ممد و معاون بنے ہوئے ہیں۔
اداروں کے دعوؤں پر تصدیق مہر
سکیورٹی حلقوں کی جانب سے طویل عرصے سے یہ مؤقف برقرار رکھا گیا ہے کہ حقوق کی آڑ میں کام کرنے والی بعض قوم پرست تنظیمیں دراصل دہشت گردوں کے سیاسی ونگ کے طور پر سہولت کاری کا فریضہ انجام دے رہی ہیں۔
ٹی ٹی پی کی جانب سے ماہ رنگ بلوچ کے حق میں یہ اعلانیہ ویڈیو جاری ہونا اس سکیورٹی بیانیے کی حتمی تائید ہے، جس نے پسِ پردہ متحرک نیٹ ورک کے تمام مہرے واضح کر دیے ہیں۔
ملک کے خلاف گہری سازش
مبصرین کا کہنا ہے کہ ایک مسلح کارروائیوں میں ملوث کالعدم تنظیم کا ایک قوم پرست رہنما کی حمایت میں اس طرح تڑپ اٹھنا اس بات کی علامت ہے کہ ان کے تانے بانے ایک ہی جگہ ملتے ہیں۔
عوام اور اداروں کو آمنے سامنے لانے کی یہ منظم کوشش اس خطرناک گٹھ جوڑ کا حصہ ہے، جس کا مقصد بلوچستان میں جاری ترقیاتی عمل کو روکنا اور ملک کو داخلی عدم استحکام سے دوچار کرنا ہے۔ سیکیورٹی فورسز اور عوام اس ملک دشمن گٹھ جوڑ کو ناکام بنانے کے لیے پوری طرح پرعزم ہیں۔
دیکھیے: پاکستان میں ملوث افغان دہشت گردوں کے افغانستان میں جنازے، شواہد سامنے آ گئے