امریکی میڈیا کے مطابق امریکہ نے 75 ممالک کے شہریوں کے لیے امیگرنٹ ویزا پروسیسنگ عارضی طور پر معطل کرنے کا فیصلہ کیا ہے۔ اس اقدام کا مقصد امیگریشن درخواستوں کی ازسرِنو جانچ پڑتال اور ویزا اسکریننگ کے عمل کو مزید سخت بنانا بتایا جا رہا ہے۔
رپورٹس کے مطابق یہ فیصلہ امریکی امیگریشن قانون کے تحت “پبلک چارج رول” کے نفاذ سے منسلک ہے۔ پبلک چارج سے مراد ایسے افراد ہیں جن کے بارے میں خدشہ ہو کہ وہ مستقبل میں امریکی حکومت کی مالی یا سماجی امداد پر انحصار کر سکتے ہیں۔
امریکی میڈیا کا کہنا ہے کہ پبلک چارج کے تعین کے لیے درخواست گزار کی مالی حیثیت، صحت، عمر، روزگار، تعلیمی پس منظر اور ماضی میں سرکاری امداد حاصل کرنے کے ریکارڈ کا جائزہ لیا جاتا ہے۔ حکام کے مطابق اس عمل کے ذریعے یہ جانچنا مقصود ہے کہ آیا درخواست گزار امریکہ میں خود کفیل رہ سکے گا یا نہیں۔
رپورٹس کے مطابق یہ پابندی صرف امیگرنٹ ویزوں پر لاگو ہوگی، جبکہ سیاحتی، کاروباری اور طالبعلم ویزے اس فیصلے سے متاثر نہیں ہوں گے۔
ابتدائی اطلاعات کے مطابق متاثرہ ممالک کی فہرست میں ایران، روس، صومالیہ، افغانستان سمیت متعدد ممالک شامل ہیں، تاہم امریکی حکام کی جانب سے حتمی فہرست اور تفصیلی ہدایات جلد جاری کیے جانے کا امکان ہے۔
امیگریشن ماہرین کے مطابق اس فیصلے سے ہزاروں درخواست گزار متاثر ہو سکتے ہیں، جبکہ انسانی حقوق کے حلقوں کی جانب سے اس اقدام پر تنقید بھی متوقع ہے۔
دیکھیں: ایران میں جاری احتجاج اور ایران امریکہ تعلقات؛ اب تک ہم کیا جانتے ہیں؟
