برطانیہ کے وزیراعظم کیئر اسٹارمر نے مشرقِ وسطیٰ میں جاری کشیدگی کو کم کرنے اور خطے میں استحکام لانے کے لیے پاکستان کے مثبت کردار کو سراہتے ہوئے حکومتِ پاکستان کا شکریہ ادا کیا ہے۔ ہاؤس آف کامنز میں ایک سوال کا جواب دیتے ہوئے برطانوی وزیراعظم نے واضح کیا کہ عالمی امن بالخصوص مشرقِ وسطیٰ کی صورتحال میں پاکستان کی سفارت کاری انتہائی اہمیت کی حامل ہے۔
کیئر اسٹارمر نے ایوان کو بتایا کہ گزشتہ جمعہ کو ان کی وزیراعظم شہباز شریف سے تفصیلی گفتگو ہوئی تھی۔ اس دوران انہوں نے پاکستانی ہم منصب سے دریافت کیا کہ برطانیہ مذاکرات کے عمل کو کامیاب بنانے اور مثبت نتائج کے حصول کے لیے کس طرح اپنا معاون کردار ادا کر سکتا ہے۔ انہوں نے زور دیا کہ موجودہ حالات میں مذاکرات کی حمایت ناگزیر ہے تاکہ صورتحال کو مزید بگڑنے سے روکا جا سکے۔
پاکستانی قیادت کو خراجِ تحسین
اس سے قبل برطانوی رکنِ پارلیمنٹ افضل خان نے بھی ایوان میں مشرقِ وسطیٰ میں کشیدگی کے خاتمے کے لیے وزیراعظم شہباز شریف، نائب وزیراعظم و وزیرِ خارجہ اسحاق ڈار اور آرمی چیف جنرل عاصم منیر کی مشترکہ کوششوں کی بھرپور حمایت کی۔ انہوں نے کہا کہ پاکستان کی جانب سے امن کے لیے کی جانے والی یہ کاوشیں عالمی سطح پر قدر کی نگاہ سے دیکھی جا رہی ہیں اور اس وقت پوری دنیا ان اقدامات پر پاکستان کی احسان مند ہے۔
