امریکی چارج ڈی افیئرز نیٹلی بیکر نے 2025 میں پاک امریکہ تعلقات کا جائزہ پیش کرتے ہوئے کہا ہے کہ دونوں ممالک کے درمیان شراکت داری پہلے سے کہیں زیادہ مضبوط ہوئی ہے۔ انہوں نے ایک ویڈیو پیغام میں کہا کہ امریکی سرمایہ کاری کے ذریعے ہزاروں نئی ملازمتیں پیدا ہوئیں اور غذائی تحفظ کے شعبے میں بھی بہتری آئی۔
نیٹلی بیکر کے مطابق امریکہ نے پاکستان کے عدالتی نظام اور قانون نافذ کرنے والے اداروں کو مستحکم کرنے کے لیے تعاون کیا۔ انہوں نے سیلاب سے متاثرہ علاقوں میں امریکی امداد کا بھی تذکرہ کیا، جس سے ہزاروں خاندانوں کو فوری ریلیف ملا۔
انہوں نے فلبرائٹ پروگرام کی 75ویں سالگرہ اور اسلام آباد میں نئی امریکی تعلیمی فاؤنڈیشن کی عمارت کے افتتاح کو دونوں ممالک کے تعلیمی و ثقافتی تعلقات کے لیے اہم سنگ میل قرار دیا۔ بیکر نے کہا کہ دونوں ممالک مستقبل میں محفوظ، مضبوط اور خوشحال تعلقات کے لیے پرعزم ہیں۔
نیٹلی بیکر نے اس ویڈیو میں یہ بھی واضح کیا کہ سرمایہ کاری، تعلیمی اور ثقافتی تبادلے اور مضبوط تعاون نے پاک امریکہ تعلقات میں ایک نیا اور طاقتور باب رقم کیا۔ ویڈیو میں وہ لمحات بھی دکھائے گئے جو اس بات کی تصدیق کرتے ہیں کہ دونوں ممالک مستقبل میں محفوظ، مضبوط اور خوشحال تعلقات کے لیے پُرعزم ہیں۔