کاراکاس: جنوبی امریکی ملک وینزویلا میں آنے والے تباہ کن زلزلے کے نتیجے میں ہلاکتوں کی تعداد بڑھ کر 920 ہو گئی ہے جبکہ 3 ہزار سے زائد افراد شدید زخمی ہیں۔ زلزلے کے شدید جھٹکوں کے بعد ملک کے متاثرہ علاقوں میں آفٹر شاکس کا سلسلہ اب بھی جاری ہے، جس کے باعث شہریوں میں شدید خوف و ہراس پایا جا رہا ہے۔
برطانوی ذرائع ابلاغ کے مطابق، زلزلے کی وجہ سے بڑے پیمانے پر تباہی ہوئی ہے اور ملبے تلے دبے یا لاپتا ہونے والے افراد کی تعداد 50 ہزار سے تجاوز کر گئی ہے۔ متاثرہ علاقوں میں ہنگامی حالت نافذ کر کے بڑے پیمانے پر امدادی کاروائیاں شروع کر دی گئی ہیں، تاہم مٹی کے تودے گرنے اور مواصلاتی نظام معطل ہونے کی وجہ سے ریسکیو ٹیموں کو مشکلات کا سامنا ہے۔
دوسری جانب، امریکی جیولوجیکل سروے نے خدشہ ظاہر کیا ہے کہ زلزلے کی شدت اور تباہی کے پیشِ نظر حتمی اموات کی تعداد 10 ہزار سے بھی تجاوز کر سکتی ہے۔ حکام کا کہنا ہے کہ ملبہ ہٹانے کا کام جیسے جیسے آگے بڑھے گا، ہلاکتوں میں مزید اضافے کا اندیشہ ہے۔
متاثرین کو محفوظ مقامات پر منتقل کرنے اور زخمیوں کو ہسپتالوں میں طبی امداد فراہم کرنے کا عمل متبادل راستوں کے ذریعے جاری ہے۔