راولپنڈی اور اسلام آباد کے بعد پشاور کے بازاروں میں خوف کی علامت بننے والا خواتین پر مشتمل خطرناک گروہ ‘ڈائن’ آخرکار پشاور پولیس کے جال میں آ گیا۔
رپورٹ کے مطابق یہ گروہ مختلف شہروں کے بازاروں میں خواتین کو باتوں میں الجھا کر، ہمدردی، تعویذ اور “بس ایک منٹ رکیں بہن” جیسے حربوں کے ذریعے لاکھوں روپے لوٹ چکا تھا۔ متاثرہ خواتین کا کہنا ہے کہ بعد میں انہیں معلوم ہوا کہ جادو نہیں ہوا، بلکہ یہ ہاتھ کی صفائی تھی۔
ایس پی سٹی کی نگرانی میں خصوصی ٹیم نے بازاروں میں مخبر تعینات کر کے گروہ کا سراغ لگایا اور اسے رنگے ہاتھوں گرفتار کر لیا۔ گرفتار خواتین کے قبضے سے نقدی، پرس، موبائل فون اور وارداتوں میں استعمال ہونے والی دیگر اشیاء برآمد ہوئیں۔
پولیس حکام کا کہنا ہے کہ ‘ڈائن’ پشاور کے لیے ایک بڑا چیلنج تھی، مگر اب بازار محفوظ ہیں اور گروہ کا جادو ٹوٹ گیا۔ شہریوں نے پولیس کی کارروائی کو سراہتے ہوئے کہا کہ “آخرکار ڈائن کو بھی پتا چل گیا کہ پشاور پولیس سے بڑا کوئی جادو نہیں۔”
پولیس مزید تفتیش کر رہی ہے تاکہ گروہ سے دیگر وارداتوں کے راز معلوم کیے جا سکیں، اور شہریوں کو ہدایت کی گئی ہے کہ کسی بھی مشکوک سرگرمی کو دیکھتے ہی پولیس کو اطلاع کریں۔